Прэзыдэнт Украіны Ўладзімір Зяленскі заявіў, што неўзабаве Ўкраіна разам з эўрапейскімі партнэрамі сфармуе мірны плян, у якім будуць вызначаныя ўсе чырвоныя лініі.
«Неўзабаве мы ўсе ў Эўропе сфармуем нашы супольныя пазыцыі — лініі, якіх мусім дасягнуць, і лініі, зь якіх ня можам адступіць. Такія пазыцыі будуць прадстаўленыя нашым партнэрам у Злучаных Штатах Амэрыкі. Надзейнасьць, працягласьць міру і правільная дамова пра заканчэньне вайны — гэта сапраўды наш супольны прыярытэт», — сказаў Уладзімір Зяленскі ў сваім відэазвароце ў ноч на 3 лютага.
Перад сваім адлётам зь Вялікай Брытаніі ўкраінскі прэзыдэнт заявіў, што дамова аб спыненьні вайны павінна быць «сумленнай, справядлівай і стабільнай», а таксама прадугледжваць гарантыі бясьпекі. «Я не хачу гаварыць пра дэталі, пакуль няма подпісаў... Ёсьць шмат рэчаў, над якімі трэба падумаць», — дадаў ён.
«Украіна ніколі не прызнае акупаваных Расеяй тэрыторый. Для нас гэта будзе часовай акупацыяй. Нашыя тэрыторыі і нашыя каштоўнасьці не прадаюцца. Нашы свабоды не прадаюцца», — заявіў Уладзімір Зяленскі брытанскім журналістам у аэрапорце ў Лёндане, паведаміла выданьне Sky News.
Другога сакавіка ў Лёндане адбыўся саміт, прымеркаваны Ўкраіны. Паводле ўкраінскага боку, у ім удзельнічалі 18 кіраўнікоў дзяржаў, урадаў і міжнародных інстытуцый.
На саміце абмеркавалі працяг фінансавай падтрымкі ўкраінскай абароннай прамысловасьці, уключна зь інвэстыцыямі ва ўнутраную вытворчасьць зброі, а таксама павелічэньне фінансаваньня абароннай прамысловасьці Эўропы.
У часе саміту заявілі аб агульнай пазыцыі наконт моцных гарантый бясьпекі, якія павінны быць асновай патэнцыйнага замірэньня. У прыватнасьці, як паведамілі ў Офісе прэзыдэнта Ўкраіны, разглядаюць магчымасьць выкарыстаньня мэханізмаў Паўночнаатлянтычнай дамовы як адной з гарантыяў бясьпекі і ўзмацненьня ўкраінскай арміі.
2 лютага прэм’ер-міністар Вялікай Брытаніі Кір Стармэр паведаміў, што Вялікая Брытанія разам з Францыяй і Ўкраінай дамовіліся падрыхтаваць плян «спыненьня баявых дзеяньняў», які потым прадставяць ЗША.
Саміт адбыўся на тле напружанасьці пасьля таго, як 28 лютага ў Белым доме адбылася эмацыйная дыскусія паміж Уладзімірам Зяленскім, прэзыдэнтам ЗША Дональдам Трампам і віцэ-прэзыдэнтам Джэй Ды Вэнсам пра вайну Расеі ва Ўкраіне.
Форум