Гэгсэт, выступаючы перад кантактнай групай у справе абароны Ўкраіны, таксама сказаў, што «жорсткая стратэгічная рэальнасьць перашкаджае Злучаным Штатам засяродзіцца ў першую чаргу на бясьпецы Эўропы», бо ЗША засяроджваюцца на «бясьпецы нашых уласных межаў» і «перадухіленьні вайны з Кітаем у Ціхіаакіянскім рэгіёне».
Гэгсэт падкрэсьліў, што прэзыдэнт ЗША Дональд Трамп вызначыў галоўным прыярытэтам «спыненьне баявых дзеяньняў і дасягненьне трывалага міру» ва Ўкраіне.
«Ён мае намер пакласьці канец гэтай вайне шляхам дыпляматыі і прыцягненыя за стол перамоваў і Расеі, і Украіны. І Міністэрства абароны ЗША дапаможа дасягнуць гэтай мэты, — цытуе Гэгсэта Fox News. — Мы хочам сувэрэннай і квітучай Украіны. Але мы павінны пачаць з прызнаньня таго, што вяртаньне да межаў Украіны, якія былі да 2014 году, зьяўляецца нерэалістычнай мэтай. Пагоня за гэтай ілюзорнай мэтай толькі падоўжыць вайну і прычыніць яшчэ больш пакутаў».
Гэгсэт таксама сказаў, што не разглядае сяброўства Ўкраіны ў NATO як магчымую частку гарантыяў бясьпекі для Ўкраіны. Паводле яго, гарантамі могуць выступіць войскі эўрапейскіх і неэўрапейскіх краінаў, але не ЗША.
«Калі гэтыя войскі будуць разгорнутыя ў якасьці міратворцаў ва Ўкраіне ў любы момант, яны павінны быць разгорнуты ў рамках місіі, якая не ўваходзіць у NATO, і не падпадаць пад артыкул 5 [аб узаемных гарантыях бясьпекі паміж краінамі NATO]. Таксама павінен быць жорсткі міжнародны нагляд за лініяй судакрананьня, — працягнуў ён. NATO. Каб было ясна, у рамках любой гарантыі бясьпекі амэрыканскія войскі ня будуць разьмешчаны ва Ўкраіне».
Форум