63 дэпутаты прагаласавалі за прыняцьце законапраекту, сямёра выступілі супраць, паведамляе News.am.
За дакумэнт прагаласавалі прадстаўнікі кіроўнай фракцыі «Грамадзянская дамова». Апазыцыйная фракцыя «Армэнія» не прыняла ўдзелу ў галасаваньні. Яшчэ адна фракцыя «Гонар маю», якая таксама ў апазыцыі, прагаласавала супраць.
У пачатку студзеня парлямэнт Армэніі ўхваліў законапраект аб пачатку працэсу падачы заяўкі на ўступленьне ў Эўразьвяз. Расея заявіла, што гэты крок зробіць немагчымым удзел Ерэвану ў Эўразійскім эканамічным саюзе, які ўзначальвае Масква. «Армэнія гатовая быць бліжэйшай да ЭЗ настолькі, наколькі ЭЗ лічыць гэта магчымым. Мы ўбачылі прыкметы таго, што гэта магчыма», — заявіў тады кіраўнік МЗС Армэніі Арарат Мірзаян.
Паведамляюць, што ініцыятарам разгляду законапраекту ў парлямэнце выступіла грамадзянская ініцыятыва «Плятформа дэмакратычных сілаў». За два месяцы яна сабрала 60 тысяч подпісаў, неабходных, каб перадаць дакумэнт на разгляд дэпутатаў.
- Стасункі Армэніі з асобнымі чальцамі інтэграцыйных утварэньняў на постсавецкай прасторы пачалі астываць з канца 2020 году на фоне канфлікту вакол Карабаху. 23 траўня 2024 году прэм’ер-міністар Армэніі Нікол Пашыньян, выступаючы ў парлямэнце краіны, заявіў, што «як мінімум дзьве краіны АДКБ (...) удзельнічалі ў рыхтаваньні вайны» супраць Армэніі, хоць і «стварылі імітацыю таго, што дапамагаюць нам». Пашыньян не ўдакладніў, якія краіны мае на ўвазе, але мімаходзь згадаў у прамове Аляксандра Лукашэнку. У карабаскім канфлікце Лукашэнка падтрымаў Азэрбайджан, а АДКБ, куды ўваходзяць Беларусь і Армэнія, бязьдзейнічала.
- Арменія, якая падтрымлівала Нагорны Карабах, раскрытыкавала АДКБ за брак падтрыманьня ў вайне з Азэрбайджанам і фактычна згарнула ўдзел у дзейнасьці арганізацыі. 14 траўня 2024 году Пашыньян заявіў, што ўдзел Армэніі ў АДКБ замарожаны, а магчымасьць выхаду Армэніі з блёку — «тэма для далейшага абмеркаваньня». Таксама ў у Ерэване сталі абмяркоўваць пэрспэктывы эўраінтэграцыі.
- 13 чэрвеня 2024 году Пашыньян паведаміў, што ні ён, ні які-небудзь іншы афіцыйны прадстаўнік краіны не паедзе ў Беларусь, пакуль ва ўладзе знаходзіцца Лукашэнка. Гэтую пазыцыю прэм’ер-міністар пацьвердзіў, адмовіўшыся прыяжджаць у беларускую сталіцу ў траўні 2025 году на саміт Эўразійскага эканамічнага саюзу.
- У чэрвені 2024 зь Менску адклікалі амбасадара Армэніі Разьміка Хумар’яна. Ерэван ня мае намеру вяртаць яго ў Беларусь.
- Пасьля таго, як Лукашэнка ў інтэрвію дзяржаўнаму тэлеканалу РФ «Россия» раскрытыкаваў курс армянскіх уладаў на збліжэньне з Захадам, 21 жніўня дэмакратычныя сілы Армэніі запатрабавалі ад уладаў краіны «неадкладна разарваць дыпляматычныя стасункі зь Беларусьсю да зьняцьця дыктатара Лукашэнкі з пасады». Іх прадстаўнікі прыйшлі да беларускай амбасады і закідалі місію яйкамі, памідорамі і бульбай. У сувязі з гэтым у беларускі МЗС выклікалі часовага паверанага ў справах Армэніі ў Менску.
Форум