Беларускі лічбавы сэрвіс «Новая Беларусь», створаны Паўлам Ліберам, абвясьціў пра правядзеньне рэбрэндынгу і падзел на два праекты: SVAE — абноўленую мабільную аплікацыю для беларусаў і беларусак за мяжой і «Тры Сланы» — грамадзянска-палітычную плятформу, запуск якой адбудзецца ў бліжэйшыя тыдні, паведамляецца ў прэс-рэлізе.
Разам з рэбрэндынгам праграма набыла новыя функцыі, але місія праекту не зьмянілася. «Гэта ня проста новая назва, а разьвіцьцё праекту ў больш шырокім ключы. Мы аб’ядноўваем беларусаў і беларусак ва ўсім сьвеце, ствараючы бясьпечную прастору для зносінаў, узаемадапамогі і рэалізацыі сумесных ініцыятываў», — тлумачаць распрацоўнікі.
Рэбрэндынг вырашылі правесьці, бо наяўная аплікацыя стала занадта вялікай і разгалінаванай. Плятформа пад новай назвай SVAE атрымала шэраг функцыянальных абнаўленьняў:
- Запусьціўся мэдыяагрэгатар — так карыстальнікі могуць ствараць сваю пэрсанальную стужку зь беларускіх і замежных СМІ і ютуб-каналаў, абіраючы сваю мову і цікавыя для сябе тэмы.
- Зьявілася мапа прастораў — на ёй паводле геалякацыі адлюстроўваюцца беларускія пляцоўкі ў розных гарадах сьвету, дзе можна сустрэцца, пагутарыць і знайсьці патрэбнае.
- Зрабілі асобную ўкладку «Грамадзтва» — гэта прастора для абмеркаваньня грамадзка-палітычных пытаньняў, дзе карыстальнікі змогуць актыўна ўдзельнічаць у дыскусіях. Яе можна будзе ўключыць ці адключыць у адзін клік.
- Зьявіўся фармат сторыз паводле аналёгіі з Instagram — празь іх можна атрымаць хуткі доступ да галоўных навінаў і падзеяў у фармаце, які лёгка ўспрымаецца і дапамагае не прапусьціць важнае.
- Запусьціўся AI-пошук — разумны пошук, які дапамагае хутка знайсьці патрэбную інфармацыю ўнутры аплікацыі.
- Палепшылася пэрсаналізацыя (кожны карыстальнік можа наладзіць аплікацыю пад свае інтарэсы і патрэбы), абнавіўся дызайн і інтэрфэйс — яны сталі інтуітыўна больш зразумелымі.
«Мы хацелі зрабіць SVAE ня толькі зручнай, але і бясьпечнай. Карыстальнікі могуць выбіраць паміж звычайным і ананімным профілем, а плятформа не зьбірае пэрсанальных зьвестак», — падкрэсьліваюць распрацоўнікі.
Неўзабаве зьявіцца і асобная бясьпечная палітычная плятформа, яна будзе даступная ў вэб-вэрсіі. «Мы сьвядома выбралі вэб-фармат, бо выдаліць сьляды мабільнай праграмы з афіцыйных крамаў бяз рызыкі для карыстальнікаў немагчыма. Гэта забясьпечыць максымальную ананімнасьць і бясьпеку», — адзначаюць прадстаўнікі праекту.
Таксама SVAE працягвае падтрымліваць беларускія ініцыятывы, уключаючы мапу бізнэсаў, афішу імпрэзаў, суполкі па інтарэсах, базу карысных праектаў і курсаў, падатковую ініцыятыву па стварэньні і фінансаваньні актуальных праектаў, а таксама плятформы LegalHub і E-здароўе, якія даюць доступ да бясплатнай юрыдычнай і мэдычнай дапамогі.
Абнавіць праграму ці спампаваць яе можна па спасылках: iOS / Android.
Карыстацца сэрвісам у Беларусі не рэкамэндуюць з прычыны бясьпекі.
Форум