Аб гэтым заявіў прэзыдэнт Украіны Уладзімір Зяленскі. Хто менавіта прыедзе ва Ўкраіну, ён не сказаў, аднак зазначыў, што гэта «сур’ёзныя людзі».
«Могуць быць розныя меркаваньні, але павінна быць агульнае бачаньне галоўнага — як спыніць Пуціна, як даць гарантыі бясьпекі Ўкраіне», — сказаў Зяленскі.
Раней СМІ паведамлялі аб тым, што Кіеў можа наведаць спэцпрадстаўнік Трампа па Ўкраіне і Расеі Кіт Кэлаг. CNN са спасылкай на свае крыніцы піша, што Кэлага чакаюць у Кіеве 20 лютага — гэта значыць ужо пасьля канфэрэнцыі ў Мюнхэне, у якой ён мае намер прыняць удзел.
Трамп раней заяўляў, што Злучаныя Штаты цяпер вядуць абмеркаваньні аб магчымых шляхах спыненьня вайны Расеі супраць Украіны з абодвума бакамі канфлікту. Афіцыйна пры гэтым пра такія абмеркаваньні і пра тое, хто ў іх удзельнічаў, не паведамлялася. Сам Трамп заявіў, што ўжо размаўляў па тэлефоне з расейскім прэзыдэнтам Уладзімірам Пуціным, аднак калі менавіта гэта было і колькі разоў, не сказаў. У Крамлі гэтыя словы не пацьвердзілі і не абверглі.
Па шэрагу пакуль афіцыйна не пацьверджаных паведамленьняў, у Мюнхэне на палях канфэрэнцыі па бясьпецы Зяленскі правядзе сустрэчу зь віцэ-прэзыдэнтам ЗША Джэй Ды Вэнсам. Вэнс у панядзелак накіраваўся зь візытам у Эўропу, гэта яго першае замежнае турнэ пасьля інаўгурацыі 20 студзеня. 40-гадовы віцэ-прэзыдэнт ЗША прыме ўдзел у канфэрэнцыі ў Парыжы, прысьвечанай разьвіцьцю штучнага інтэлекту. Канфэрэнцыю ў панядзелак адкрыў прэзыдэнт Францыі Эманюэль Макрон, удзельнічае таксама высокапастаўлены прадстаўнік Кітаю.
Як заявіў перад сваёй паездкай Вэнс, адной з галоўных тэм яго візыту ў Парыж будзе вайна ва Ўкраіне. Ён мае намер абмеркаваць магчымыя дыпляматычныя намаганьні па спыненьні канфлікту зь лідэрамі розных краін, якія прыехалі ў Францыю. 11 лютага чакаецца яго сустрэча з кіраўніком Эўракамісіі Уршуляй фон дэр Ляен, Вэнс сустрэнецца таксама з прэм’ерам Індыі Нарэндрай Модзі. На сустрэчы з фон дэр Ляен, як чакаецца, будуць абмяркоўвацца ня толькі Ўкраіна, але і пытаньні гандлю — раней Трамп не выключыў увядзеньня мыта ў дачыненьні да прадукцыі ЭЗ. Яшчэ адной тэмай сустрэч можа стаць сытуацыя на Блізкім Усходзе.
З Парыжу Вэнс накіруецца ў Нямеччыну, дзе прыме ўдзел у канфэрэнцыі па бясьпецы. Трамп раней заяўляў, што на гэтым тыдні адбудзецца сустрэча з Уладзімірам Зяленскім, аднак з яго слоў не вынікае, што з украінскім прэзыдэнтам будзе сустракацца сам прэзыдэнт ЗША — ён пакуль не зьбіраецца пакідаць тэрыторыю краіны. Пра візыт Зяленскага ў Вашынгтон таксама не паведамлялася.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум