Як адзначаецца ў Telegram-канале ведамства, праверка праходзіць пад кіраўніцтвам начальніка Генэральнага штабу – першага намесьніка міністра абароны Паўла Муравейкі.
«Асабовы склад, у тым ліку вайсковабавязаныя, прызваныя з запасу, выканаюць увесь комплекс мерапрыемстваў у падрыхтоўцы ўзбраеньня, вайсковай і спэцыяльнай тэхнікі да выкарыстаньня, выйдуць у вызначаныя раёны», — адзначаецца ў паведамленьні.
Праверку баявой гатоўнасьці будзе праходзіць як на палігонах, так і на «незнаёмых участках мясцовасьці». У часе вучэньняў плянуюць апрабаваць «новыя спосабы выкарыстаньня выведных і ўдарных бесьпілётных авіяцыйных комплексаў».
«Абстаноўка абавязвае нас трымаць руку на пульсе і трымаць порах сухім, быць гатовымі да таго, для чаго прызначаныя Ўзброеныя сілы, пры неабходнасьці — забясьпечыць абарону сувэрэнітэту і тэрытарыяльнай цэласнасьці Рэспублікі Беларусь», — заявіў міністар абароны Беларусі Віктар Хрэнін.
Паводле яго, у часе вучэньняў прадугледжана выкарыстаньне сродкаў радыёэлектроннай барацьбы для «абясшкоджаньня каналаў кіраваньня і для супрацьдзеяньня бесьпілётным лятальным апаратам».
Кіраўніцтва Беларусі падтрымала агрэсію Расеі супраць Украіны і дазволіла скарыстаць вайсковую інфраструктуру і паветраную прастору для ўварваньня расейскай арміі і абстрэлаў мірных гарадоў Украіны, ахвярамі якіх сталі дзясяткі тысяч цывільных украінцаў.
Беларусь, пачынаючы з 2022 году, практычна ў бесьперапынным рэжыме праводзіць вайсковыя вучэньні на сваёй тэрыторыі, у Расеі і ў іншых краінах АДКБ.
Украіна закрыла мяжу зь Беларусьсю, спыніла гандаль, арыштавала маёмасьць і прадукцыю беларускіх прадпрыемстваў і пачала ўмацоўваць сваю мяжу на беларускім кірунку, каб зрабіць немагчымым паўторны наступ расейскіх войскаў зь беларускай тэрыторыі.
Форум