Падчас рэканструкцыі самы вядомы экспанат Люўра — карціна Леанарда да Вінчы «Мона Ліза» — «пераедзе» ў новае памяшканьне, дзе на палатно можна будзе зірнуць асобна ад астатняй калекцыі музэю, за асобную плату.
Пра маштабныя пляны рэканструкцыі прэзыдэнт Эманюэль Макрон расказаў журналістам і парыскаму бамонду, стоячы менавіта пад гэтым шэдэўрам Леанарда.
Апроч асобнага памяшканьня для «Джаконды», у музэі павінен зьявіцца другі ўваход для турыстаў, каб разгрузіць асноўную дарогу ў музэй — праз славутую шкляную піраміду на плошчы перад палацам.
Па словах Макрона, які выступіў ініцыятарам праекту «Новы Рэнэсанс», усе працы павінны заняць каля пяці гадоў, і абноўлены Люўр адчыніць свае дзьверы наведнікам не пазьней за 2031 год.
Прыкладна тры чвэрці з 30 тысяч штодзённых наведнікаў музэю прыходзяць паглядзець у першую чаргу менавіта на знакамітую карціну Леанарда да Вінчы. Аднак з прычыны неверагоднай папулярнасьці партрэта наглядчыкі і ахова Люўра бесьперапынна праганяюць натоўп праз Залю Мастацтваў, даючы ім на тое, каб разгледзець карціну і зрабіць фатаграфію, у сярэднім каля 50 сэкундаў.
Згодна з праектам Макрона, перароблены будзе ўсходні фасад палаца. Сёньня гэта клясычная калянада, зьвернутая да сухога штучнага рова і эсплянады, якая выкарыстоўваецца мала.
Форум