Фатаграфіі сятчаткі ў задняй частцы вока могуць сьведчыць пра здароўе мозгу, і, выкарыстоўваючы праграмнае забесьпячэньне штучнага інтэлекту для аналізу атрыманай інфармацыі, навукоўцы змогуць заўважыць прыкметы хваробы да зьяўленьня якіх-небудзь сымптомаў, піша ВВС.
Дасьледчая група NeurEYE сабрала амаль мільён сканаваньняў вачэй у оптыкаў па ўсёй Шатляндыі — гэта самы вялікі аб’ём зьвестак такога роду ў сьвеце — і з дапамогай штучнага інтэлекту распрацавала альгарытм, які можа ацаніць стан крывяносных судзін у вачах, што можа сьведчыць пра нэўрагенэратыўныя захворваньні.
База дадзеных, якую стварыла каманда, можа быць прымененая да фатаграфій, зробленых падчас звычайных аглядаў вачэй, і ў канчатковым выніку можа выкарыстоўвацца альбо для прадухіленьня захворваньня, альбо для дыягностыкі захворваньняў на значна больш раньняй стадыі, чым цяпер даступна.
Крывяносныя судзіны ў вачах вельмі дробныя і тонкія, і прыкметы хваробы ў іх могуць выявіцца раней, чым у іншых частках цела чалавека.
Балджын Дылён, прафэсар клінічнай афтальмалёгіі ў Эдынбурскім унівэрсытэце, адзін з кіраўнікоў NeurEYE, лічыць:
«Вока можа сказаць нам значна больш, чым мы лічылі магчымым. Сятчатка зьмяшчае мноства інфармацыі, гэта біялягічны баромэтар здароўя нашага мозгу.
Мы можам бачыць сятчатку з дапамогай простага недарагога абсталяваньня, якое можна знайсьці на кожнай вуліцы Вялікай Брытаніі і за яе межамі.
Штосьці вельмі простае, напрыклад, фатаграфія сятчаткі, цяпер можа быць выкарыстана для патэнцыйнага прадказаньня зьмены мозгу ў далейшым жыцьці».
Што такое дэмэнцыя
Дэмэнцыя — гэта хвароба, якая перашкаджае нармальнай працы клетак мозгу чалавека і ўплывае на здольнасьць запамінаць, думаць і гаварыць. Паводле зьвестак Dementia UK, гэта закранае кожнага 14-га чалавека ва ўзросьце больш за 65 гадоў і кожнага шостага чалавека ва ўзросьце больш за 80 гадоў.
Лекаў ад дэмэнцыі пакуль няма, але пры раньняй дыягностыцы пацыент можа атрымаць лячэньне раней і мець дадатковы час, каб адаптавацца і падрыхтавацца да будучыні.
Форум