Сыстэма не пачне працаваць 10 лістапада, як плянавалася, паведаміла журналістам кіраўніца камісіі ЭЗ ва ўнутраных справах Ільва Югансан. Новага графіку пакуль няма, але разглядаецца магчымасьць паэтапнага ўвядзеньня, дадала яна.
Сыстэма ўезду/выезду (EES) мусіць стварыць лічбавы запіс, які зьвязвае праязны дакумэнт з біямэтрычнымі дадзенымі, якія пацьвярджаюць асобу, што выключыць неабходнасьць уручную ставіць штамп у пашпарце на вонкавай мяжы ЭЗ.
Гэта запатрабуе ад грамадзян краін, якія не зьяўляюцца сябрамі ЭЗ і прыбываюць у Шэнгенскую зону свабоднага перамяшчэньня, рэгістрацыі адбіткаў пальцаў, сканаваньня твару і адказаў на пытаньні наконт іх знаходжаньня.
Прадстаўнік Міністэрства ўнутраных спраў Нямеччыны заявіў, што тры краіны, на якія прыпадае 40% пасажырапатоку, не гатовыя да ўвядзеньня EES, бо «яшчэ не дасягнутыя неабходная стабільнасьць і функцыянальнасьць» цэнтральнай сыстэмы EES, якую забясьпечвае агенцтва па ўкараненьні ІТ-сыстэм у Эўразьвязе. Міністэрства ўнутраных спраў Францыі заявіла, што, хаця Францыя перакананая ў карыснасьці EES, яе ўкараненьне мусіць быць належным чынам падрыхтаванае.
Запуск EES быў заплянаваны на 2022 год, аднак ён неаднаразова зрываўся праз тэхнічныя праблемы і затрымкі з усталяваньнем аўтаматызаваных бар’ераў на ўсіх міжнародных сухапутных, марскіх і паветраных межах Шэнгенскай зоны.
Раней паведамлялася, што Эўрапейскі Зьвяз з 10 лістапада ўводзіць новыя правілы ўезду ў краіны Шэнгенскай зоны. Пры першым уезьдзе ў грамадзян будуць прымаць біямэтрычныя дадзеныя: адбіткі пальцаў і фота твару. Зьвесткі будуць захоўвацца тры гады, паўторна іх здаваць ня трэба. Гэтыя захады павінны спрасьціць перасячэньне мяжы, перадухіліць выкарыстаньне падробленых пашпартоў і супрацьдзейнічаць нелегальнай міграцыі.
Форум