Пра гэта паведамляе «Эўрапейская праўда».
У апублікаваным у Facebook роліку Фіца заявіў, што ў яго страляў «актывіст славацкай апазыцыі».
Цяпер прэмʼер на хатнім лячэньні.
«Калі ўсё пойдзе паводле пляну, я магу паступова вярнуцца да працы ў канцы чэрвеня — пачатку ліпеня», — заявіў ён.
Далей прэмʼер Славаччыны сказаў, што ён даруе асобе, якая ўчыніла замах, і «не адчувае ніякай нянавісьці да чалавека, які ў мяне страляў». Ён паабяцаў, што ня будзе падаваць на яго ў суд і патрабаваць ад яго кампэнсацыі.
«Я дарую яму, няхай ён сам разьбярэцца ў сваёй галаве, што ён зрабіў і чаму ён гэта зрабіў. У рэшце рэшт, відавочна, што ён быў толькі пасланцам зла, якое палітычна няўдалая і расчараваная апазыцыя разьвязала да некіравальных маштабаў», — лічыць Фіца.
Замах на Робэрта Фіца быў зроблены 15 траўня пасьля выязнога пасяджэньня ўраду ў горадзе Гандлава. Першы час пасьля інцыдэнту былі сумневы, ці выжыве паранены прэмʼер.
Нападнікам быў 71-гадовы Юрай Цынтула. На допыце ён сьцьвярджаў, што хацеў не забіць Фіца, а толькі «нашкодзіць здароўю», каб той ня змог далей праводзіць палітыку, зь якой Цынтула нязгодны, у тым ліку і ў пытаньні вайны Расеі з Украінай.
Форум