У Севастопалі, на тэрыторыі акупаванага Расеяй Крыму, з 29 траўня па 2 чэрвеня праходзілі міжнародныя спаборніцтвы па спартовым праграмаваньні «Код міру», прымеркаваныя да 80-годзьдзя вызваленьня гэтага крымскага горада ад нямецка-фашысцкіх захопнікаў.
Як паведаміў тэлеканал «Первый Севастопольский», у спаборніцтвах удзельнічалі каманды з Крыму, так званай «ДНР», Бранскай, Ліпецкай, Арэнбурскай, Разанскай абласьцей, акупаванай часткі Запароскай вобласьці, а таксама з Азэрбайджану, Беларусі, Кіргістану і Паўднёвай Асэтыі.
Першае месца заняла каманда з Арэнбургу, другое — з Крыму, а трэцяе — каманда з так званай «ДНР». Беларуская каманда ў лік пераможцаў ня трапіла.
Паводле зьвестак Telegram-каналу «МотолькоПомоги», ад Беларусі ўдзельнічалі студэнты Беларускага дзяржаўнага ўнівэрсытэту інфарматыкі і радыёэлектронікі. Іх выезд у Крым арганізаваў выкладчык унівэрсытэту Вадзім Уладымцаў. Гэтую інфармацыю пацьвердзіла міжнародная ініцыятыва экспэртаў iSANS.
«Ёсьць усе падставы зрабіць выснову, што выкладчык БДУІР арганізавана вывез студэнтаў для ўдзелу ў турніры, які мала таго, што праходзіў на акупаванай тэрыторыі, але і ва ўмовах удараў з боку Ўзброеных сіл Украіны, што робіць удзел у такім турніры небясьпечным», — адзначылі ў iSANS.
Паводле міжнароднай ініцыятывы, з пачатку 2024 году назіраецца няспыннае павелічэньне кантактаў навучальных устаноў Беларусі з акупаванымі Расеяй тэрыторыямі.
Форум