Супраца беларускіх прадпрыемстваў з Іркуцкім авіязаводам, які выпускае вайсковыя і пасажырскія самалёты, стала вынікам міжнародных санкцый, уведзеных супраць Расеі і Беларусі.
Як адзначаецца на сайце Лукашэнкі, тэма рэалізацыі супольных праектаў у станкабудаваньні і мікраэлектроніцы стала асноўнай у часе наведваньня заводу, які выпускае самалёты для Вайскова-паветраных сіл Беларусі, а таксама зьбіраюць пасажырскі МС-21.
На заводзе Лукашэнку падарылі мадэль зьнішчальніка Су-30.
«Мой любімы самалёт. [...] Самае галоўнае — высокаманэўраны», — заявіў Аляксандар Лукашэнка.
У 2017 годзе Беларусь дамовілася з Расеяй аб набыцьці 12 баявых знішчальнікаў Су-30, створаных карпарацыяй «Іркут», у склад якой уваходзіць Іркуцкі авіязавод.
У 2022 годзе Расея перамясьціла ў Беларусь некалькі сваіх зьнішчальнікаў С-30, зь якіх пачаліся абстрэлы ўкраінскай тэрыторыі. Расейскія войскі ўжо трэці год выкарыстоўваюць гэтыя зьнішчальнікі для нанясеньня ўдараў па мірных гарадах Украіны, цяпер ужо з тэрыторыі Расеі.
Амбасадар Расеі ў Беларусі Барыс Грызлоў ня выключыў, што на беларускіх прадпрыемствах будзе арганізаваная вытворчасьць вузлоў для пасажырскай авіяцыі, а таксама невялікіх самалётаў для мясцовых авіяліній.
У красавіку амбасадар Расеі Барыс Грызлоў паведаміў, што 407-ы Менскі завод цывільнай авіяцыі і 558-ы авіярамонтны завод у Баранавічах атрымаюць заказы на вытворчасьць вузлоў расейскіх самалётаў Ту-214, Іл-96, МС-21.
4 чэрвеня стала вядома аб крушэньні Су-30 у Індыі ў часе трэнавальнага палёту, але пілёты змаглі катапультавацца. У жніўні 2023-га такі ж самалёт разьбіўся ў Калінінградзе, у кастрычніку 2022-га — у Іркуцку. У абодвух выпадках экіпажы загінулі. Паводле неафіцыйнай інфармацыі, усяго ў выніку лётных здарэньняў разьбіліся амаль 30 самалётаў Су-30. Іх пачалі выпускаць у 1989 годзе.
Форум