Прэзыдэнт Эстоніі Алар Карыс падпісаў закон аб выкарыстаньні замарожаных расейскіх актываў для кампэнсацыі шкоды, нанесенай Украіне ў выніку поўнамаштабнага ўварваньня. Пра гэта паведамляе ERR.
Карыс растлумачыў, што ў адпаведнасьці з законам эстонскія ўлады могуць сканфіскаваць і выкарыстоўваць маёмасьць толькі тых, «чыя сувязь са зьдзяйсьненьнем або садзейнічаньнем супрацьпраўнаму дзеяньню ўстаноўленая і дастаткова даказаная».
Палітык дадаў, што простае знаходжаньне пад міжнароднымі санкцыямі не пацягне за сабой адчужэньня актываў.
Прэзыдэнт Эстоніі прызнаў, што канфіскацыя маёмасьці ў сувязі з удзелам у ваеннай агрэсіі можа выклікаць «юрыдычныя пытаньні», але, як сказаў ён, «парлямэнт павінен быць у стане зрабіць палітычны выбар нават у такой няяснай сытуацыі».
Раней рашэньне аб перадачы Ўкраіне даходаў ад замарожаных актываў расейскага Цэнтрабанку ўхваліла Рада Эўразьвязу. Даходы пойдуць на вайсковую падтрымку Ўкраіны і кампэнсацыю ёй шкоды ад расейскай агрэсіі.
У Эўразьвязе замарожаныя каля 2/3 актываў расейскага Цэнтрабанку, большаю часткаю якіх кіруе бэльгійскі дэпазытар Euroclear. Зь мінулага году прыбытак ад іх інвэставаньня склаў каля 4 мільярдаў эўра. Аднак Украіна можа прэтэндаваць на 557 мільёнаў зь іх — грошы, атрыманыя да сярэдзіны лютага, бэльгійскі банк захавае для кіраваньня рызыкамі, у тым ліку зьвязаных з судовымі пазовамі з боку Расеі.
Форум