Паводле Дзяржаўнай службы надзвычайных сытуацыяў (ДСНС) Украіны, сярод загінулых — адно дзіця. Колькасьць параненых павялічылася да 30 — пяцёра зь іх дзеці, паведаміў кіраўнік абласной вайсковай адміністрацыі Сяргей Лысак. У шпіталях застаюцца 16 пацыентаў, адзін у цяжкім стане.
«Шкода нанесеная жылым дамам, студэнцкім інтэрнатам, будынкам навучальнай установы і прадпрыемствам харчаваньня, а таксама аўтамабілям. Праз атаку БПЛА ў горадзе ўзьнікла некалькі пажараў. Цяпер яны ўсе зьліквідаваныя», — гаворыцца ў паведамленьні ДСНС.
Пашкоджаныя дамы, установы адукацыі і культуры, адзін бесьпілётнік упаў побач з мэрыяй, удакладніў мэр гораду Барыс Філатаў.
У выніку дронавага нападу пашкоджаны галоўны паштамт — помнік гісторыі і архітэктуры мясцовага значэньня. У будынку пачатку ХХ стагодзьдзя выбітыя вокны і пашкоджаная ўваходная драўляная група. Таксама пашкоджаны найстарэйшы ў горадзе гатэль «Асторыя» — помнік гісторыі і архітэктуры нацыянальнага значэньня.
Расейскія вайскоўцы рэгулярна атакуюць рэгіёны Ўкраіны з ужываньнем розных відаў зброі — ударных дронаў, ракет, авіябомбаў, рэактыўных сыстэмаў залпавага агню.
Расейскае кіраўніцтва адмаўляе, што расейская армія падчас поўнамаштабнай вайны наносіць мэтанакіраваныя ўдары па цывільнай інфраструктуры гарадоў і вёсак Украіны, забіваючы мірных жыхароў і разбураючы лякарні, школы, дзіцячыя садкі, аб’екты энэрга- і водазабесьпячэньня.
Форум