Кіраўнік замежнапалітычнага ведамства Эўразьвязу Жузэп Бурэль і эўракамісар у пытаньнях эўрапейскай палітыкі суседзтва і расшырэньня Олівэр Вархэі заявілі аб нэгатыўным уплыве ўхваленьня закону «Аб празрыстасьці замежнага ўплыву» на працэс эўраінтэграцыі Грузіі.
«Выбар далейшага шляху знаходзіцца ў руках Грузіі. Мы заклікаем улады Грузіі скасаваць закон, падтрымаць сваю прыхільнасьць шляху ў Эўразьвяз і прасоўваць неабходныя рэформы, падрабязна вызначаныя ў „дзевяці кроках“», — адзначаецца ў заяве.
Прадстаўнікі Эўразьвязу заявілі аб гатоўнасьці «падтрымаць грузінаў, якія імкнуцца ў эўрапейскую будучыню».
«ЭЗ падтрымлівае грузінскі народ і ягоны выбар на карысьць дэмакратыі і эўрапейскай будучыні Грузіі. Запалохваньне, пагрозы і фізычны гвалт супраць прадстаўнікоў грамадзянскай супольнасьці, палітычных лідэраў і журналістаў, а таксама членаў іхных сем'яў непрымальныя. Мы заклікаем улады Грузіі расьсьледаваць гэтыя задакумэнтаваныя дзеяньні», — адзначаецца ў заяве.
Жузэп Бурэль і Олівэр Вархэі нагадалі, што Эўрапейская рада надала Грузіі статус кандыдата на ўступленьне ў Эўразьвяз з умовай выкананьня «дзевяці крокаў», вызначаных у рэкамэндацыях Эўракамісіі ад 8 лістапада 2023 году.
«Гэтыя крокі патрабуюць абароны правоў чалавека і забесьпячэньня свабоды дзейнасьці грамадзянскай супольнасьці і сродкаў масавай інфармацыі. Яны таксама сьведчаць аб неабходнасьці дэпалярызацыі і барацьбы з дэзынфармацыяй», — падкрэсьлілі прадстаўнік Эўразьвязу.
Паводле іх, ухвалены закон «Аб празрыстасьці замежнага ўплыву» не адпавядае асноўным нормам і каштоўнасьцям ЭЗ.
«Гэта падарве дзейнасьць грамадзянскай супольнасьці і незалежных СМІ, у той час як свабода аб’яднаньняў і свабода выказваньня думак зьяўляюцца фундамэнтальнымі права, якія ляжаць у аснове абавязаньняў Грузіі ў межах дамовы аб асацыяцыі з ЭЗ», — адзначаецца ў заяве.
Што папярэднічала
- 14 траўня парлямэнт Грузіі ў трэцім, канчатковым чытаньні зацьвердзіў так званы закон аб «іншаземных агентах». За зацьвярджэньне скандальнай ініцыятывы «Грузінскай мары» прагаласавалі 84 дэпутаты — нягледзячы на пратэсты дзясяткаў тысяч грамадзян краіны, якія выходзяць на акцыі, і крытыку міжнародных партнэраў Грузіі. 30 апазыцыянэраў прагаласавалі супраць.
- Закон, прыняты парлямэнтам, у 10-дзённы тэрмін перададуць прэзыдэнту Грузіі. Саламэ Зурабішвілі раней паабяцала, што накладзе вэта на законапраект.
- Згодна з Канстытуцыяй Грузіі, прэзыдэнт у 2-тыднёвы тэрмін падпісвае і публікуе закон або з матываванымі заўвагамі вяртае яго ў парлямэнт. У «Грузінскай мары» ёсьць дастаткова галасоў, каб пераадолець вэта. Калі і пасьля гэтага прэзыдэнт не падпіша закон, яго падпісвае і публікуе старшыня парлямэнту. Як мяркуецца, «Мара» можа канчаткова зацьвердзіць закон у сярэдзіне чэрвеня.
Форум