На выпускных імпрэзах улады не рэкамэндуюць прыцягваць артыстаў і дыджэяў, таму што яны «ня ведаюць ні традыцый школы, ні вучняў, ні пэдагогаў», і ня змогуць «стварыць душэўнай, цёплай атмасфэры», заявіў агенцтву «Мінск-Навіны» старшыня камітэта Андрэй Стрыгельскі.
Паводле чыноўніка, «сёньня ўстановы адукацыі актыўна рыхтуюцца да ўрачыстасьці, і ніякіх лімузынаў ніхто не плянуе», а ў беларускай сыстэме адукацыі «ёсьць шэраг даўно сфармаваных традыцый», якія адпавядаюць «мэнталітэту людзей».
«Безумоўна, бацькі праяўляюць пэўную ініцыятыву. Наша задача не дапусьціць неабгрунтаваных збораў грашовых сродкаў на правядзеньне выпускных вечароў, — сказаў Стрыгельскі. — Гэтыя рэчы кантралююцца кіраўніцтвам школ, праводзіцца адпаведная праца з бацькоўскім, апякунскім камітэтамі».
Сцэнары вечароў павінны мець «ідэалягічную аснову», заявіў ён:
«Такія тэмы, як 80-годзьдзе вызваленьня Беларусі ад нямецка-фашысцкіх захопнікаў, Год якасьці знойдуць сваё адлюстраваньне ў сьвяце».
Выпускныя вечарыны ў школах для вучняў 11 клясаў адбудуцца 14 чэрвеня. Месцам іх правядзеньня стануць школы і гімназіі. Традыцыйная «сустрэча сьвітаньня», па словах чыноўніка, не адмяняецца, але таксама рэгламэнтаваная.
«Выпускнікі выйдуць альбо на тэрыторыю школы, альбо за яе межы — у лесапаркавую зону, на набярэжную — і сустрэнуць сьвітанак. Супрацоўнікі міліцыі забяспечаць ахову грамадзкага парадку. Маршруты узгодненыя загадзя», — сказаў ён.
30 красавіка Аляксандар Лукашэнка заявіў аб «вельмі нэгатыўным стаўленьні» да школьных выпускных вечароў, якія ператвараюць у «шоў на лімузынах з наведваньнем забаўляльных устаноў».
«Гэта павінна быць сьвята, куды ідуць дзяўчына, хлопец, за рукі ўзяўшыся, кампаніяй, калектывам. Паскачуць, патанцуюць і сустрэнуць сьвітанак. Гэта вельмі важна», — адзначыў Лукашэнка.
Ён даручыў ураду і сваёй адміністрацыі ўзяць гэтае пытаньне «на жорсткі кантроль».
Форум