На думку дэрматолягаў, многія з нас, дбаючы пра скуру твару, забываюць пра ўсё астатняе цела. Пра тое, чаму гэтага рабіць ня варта, у сваёй мэдычнай рубрыцы піша амэрыканская The New York Times.
Да дэрматолягаў пастаянна прыходзяць пацыенты зь бездакорнай скурай на твары, але на астатніх частках цела ў іх зусім іншая карціна, скура там пераважна сухая і зморшчаная. Шмат хто мае сухія плямы на сьпіне або цёмныя плямы на руках і запясьцях.
Таму лекары настойліва нагадваюць, што скура астатніх частак цела патрабуе такой жа ўвагі, як і скура твару.
Менш — гэта насамрэч больш
Скура — самым вялікі орган чалавека. Яна выконвае шмат важных функцый. Гэта і рэгуляваньне тэмпэратуры цела, і абарона ад абязводжваньня, і ад пашкоджаньня ўльтрафіялетам, і ад заражэньня патэнцыйна шкоднымі мікробамі.
Лекары ведаюць, што любая праблема са скурай, якая ўзьнікае на твары — сухасьць, вугры, пашкоджаньні ад сонца ці нават рак скуры — можа ўзьнікаць і на астатніх частках цела. У людзей са сьветлым адценьнем скуры мэлянома звычайна пачынаецца на грудзях і сьпіне ў мужчын і на нагах — у жанчын, што таксама зьвязана з узьдзеяньнем сонца і зь недастаткова абароненай і дагледжанай скурай.
«Калі справа даходзіць да рэжыму догляду за скурай цела, то лепей меней, ды лепей», — сказаў выданьню дэрматоляг Ліндсі Бардонэ зь Нью-Ёрку.
Для вырашэньня гэтых праблем дэрматолягі прапануюць наступныя тры крокі да здаровай скуры.
Крок 1: Ачышчайце скуру правільна
Як часта вы прымаеце душ, залежыць ад вас. Але мыць кожны сантымэтар цела з мылам і кожны дзень — гэта лішняе, асабліва калі вы схільныя да сухасьці скуры ці экзэмы, кажа доктар Бардонэ.
Большасьць гатункаў мыла утрымліваюць паверхнева-актыўныя рэчывы, якія дапамагаюць змываць бруд і тлушч, але могуць і разбурыць ахоўны бар’ер скуры, што прыводзіць да сухасьці і раздражненьня.
Дэрматолягі лічаць, што намыльваць усё цела трэба ня больш як два-тры разы на тыдзень. Многія пацыенты дзівяцца такой рэкамэндацыі.
Насамрэч людзям трэба чысьціць кожны дзень толькі тыя ўчасткі цела, якія рэгулярна забруджваюцца або пацеюць: рукі, ногі, падпахі, пахвіны і крумянкі (ягадзіцы).
Таму лекары прапануюць кожны дзень мыць цела з мылам толькі ў тым выпадку, калі ваша праца патрабуе частага кантакту зь людзьмі ці мікробамі, напрыклад, у сфэры аховы здароўя ці адукацыі.
«Вы можаце карыстацца гелем для душа або мылам, але варта пераканацца, што гэты ачышчальны сродак мяккі», — кажа дэрматоляг з Паўднёвай Караліны Ларэн Плох.
Лекары рэкамэндуюць мыйныя сродкі з гліцэрынай, ніацынамідам, мачавінай, гіялюронавай кіслатой або цэрамідам, якія падтрымліваюць вільготнасьць скуры.
Рэкамэндуецца пазьбягаць антыбактэрыяльнага мыла: яно можа зьнішчаць карысныя бактэрыі, якія жывуць на скуры, і рабіць яе ўразьлівай да інфэкцый.
Таксама ня варта карыстацца грубымі мачалкамі, якія шкрабаюць цела, і мыйных сродкаў з араматызатарамі, якія могуць скуру раздражняць.
Крок 2: Увільгатненьне скуры
Па словах сучасных дэрматолягаў, наносіць лясьён ці крэм на ўсё цела, асабліва на рукі, ногі, тулава і цяжкадаступныя ўчасткі, такія як сьпіна, — неабходная для здароўя скуры працэдура.
«Некалькі разоў на дзень прыходзяць пацыенты і скардзяцца на сьверб у сьпіне, — кажа доктарка Плох. — У дэрматалёгіі мы называем гэта зімовым сьвербам».
Сьверб — адна з праяў сухой скуры, таму штодзённае ўвільгатненьне абараняе і аднаўляе скурны бар’ер і захоўвае яго вільготным, а гэта зводзіць да мінімуму імавернасьць сухасьці і раздражненьня.
Па словах доктара Бардонэ, у зімовыя месяцы ўвільгатняць скуру трэба часьцей. Тое самае трэба рабіць, калі вы схільныя да сухасьці скуры. Але калі ў вас скура сама па сабе тлустая або схільная да вугроў, то ўвільгатняць яе, наадварот, трэба радзей.
Выбірайце сродкі з інгрэдыентамі для ўвільгатненьня такімі самымі, як і ў ачышчальных сродках: кераміды, гіалюронавая кіслата, мачавіна, гліцэрына і алей насеньня шыа, якія падтрымліваюць вільготнасьць скуры. Калі ж у вас ёсьць вугры, то трэба выкарыстоўваць безалейныя сродкі.
Па словах доктара Бардонэ, найлепшы час для ўвільгатненьня скуры — адразу пасьля душу. Крэм трэба наносіць на зьлёгку вільготную скуру, каб яна захавала вільгаць на працягу дня.
Крок 3: Выкарыстоўвайце сонцаахоўныя крэмы
«Заўсёды трэба наносіць сонцаахоўны крэм на любыя ўчасткі цела, якія будуць пад узьдзеяньнем сонца, напрыклад твар, грудзі, рукі, ногі і запясьці», — кажа доктарка Плох.
У пажылых пацыентаў скура на сьпіне і плячах часта чыстая, але ніжэй за рукавы адзеньня скура пакрытая крапінкамі і плямамі — гэта прыкмета пашкоджаньня сонцам.
Большасьць экспэртаў рэкамэндуюць выкарыстоўваць сонцаахоўны крэм з SPF 30 або вышэй і наносіць яго паўторна не радзей, чым кожныя дзьве гадзіны.
Штодзённае выкарыстаньне сонцаахоўных крэмаў абараняе скуру ад шкодных ультрафіялетавых прамянёў, зьніжае рызыку раку скуры і зводзіць да мінімуму прыкметы старэньня, такія як сонечныя плямы, зьмены пігмэнтацыі і зморшчыны, кажа доктарка Плох.
Калі трэба зьвяртацца да дэрматоляга
Калі ваша скура па-ранейшаму здаецца сьцягнутай, сухой або раздражнёнай нават пасьля штодзённага выкарыстаньня мяккага ачышчальнага сродку і ўвільгатненьня, варта зьвярнуцца да спэцыяліста. У вас можа быць захворваньне скуры, напрыклад, экзэма або кантактны дэрматыт, што патрабуе спэцыяльнага лячэньня.
