Пра гэта заявіла памочніца міністра абароны ў пытаньнях міжнароднай бясьпекі Сэлест Ўоландэр, выступаючы ў камітэце Палаты прадстаўнікоў па ўзброеных сілах, піша «Голас Амэрыкі».
Паводле яе, калі ў лютым 2022 году прэзыдэнт Расеі Ўладзімір Пуцін аддаваў загад аб уварваньні ва Ўкраіну, ён разьлічваў на лёгкае заваяваньне суседняй дзяржавы. Ён таксама спадзяваўся наблізіцца да сваёй канчатковай мэты — падрыву эўрапейскай бясьпекі і трансатлянтычнага альянсу, сказала яна.
«Мэта Пуціна — падпарадкаваць сабе Ўкраіну, пазбавіць яе сувэрэнітэту і незалежнасьці, а таксама аслабіць і падарваць Эўропу, Амэрыку і асабліва, вядома, альянс NATO», — заявіла яна сябрам камітэту.
Рэакцыя ЗША была такой жа, што і ў саюзьнікаў ва ўсім сьвеце, якія хочуць убачыць «стратэгічны правал» жорсткай вайны Пуціна.
«У сваёй палітыцы ў апошнія два гады мы зыходзілі з таго, што Ўкраіна павінна застацца сувэрэннай, незалежнай эўрапейскай дзяржавай, здольнай абараняцца, стрымліваць і нанесьці тое паражэньне Пуціну, — сказала Ўоландэр. — Украіна робіць гэта пры нашай падтрымцы кожны дзень».
ЗША павінны працягваць фінансаваньне Ўкраіны, каб забясьпечыць узброеныя сілы сыстэмамі ўзбраеньняў, боепрыпасамі і навучаньнем, неабходным для абароны ад расейскай агрэсіі. Гэта мае наступствы далёка за межамі Ўкраіны, заявіла памочніца міністра.
Паводле яе, падтрымка ЗША дапамагае ўмацаваць альянс NATO для абароны інтарэсаў бясьпекі Амэрыкі ў Эўропе.
«Нашы альянсы ў Эўропе забясьпечваюць амэрыканскую вайсковую прысутнасьць у шырэйшым маштабе, на глябальным узроўні, а таксама абарону ад Расеі і яе стрымліваньне, — заявіла Ўоландэр. — Кітай назірае за нашымі дзеяньнямі ў Эўропе, таму што яны здабываюць урокі з таго, як мы выконваем нашы абавязаньні перад саюзьнікамі і партнэрамі ў Інда-Ціхаакіянскім рэгіёне. Таму нам трэба зрабіць усё, каб Пуцін пацярпеў няўдачу ў дасягненьні сваёй мэты — падрыве эўрапейскай бясьпекі».
«Урэшце, мы робім гэта для таго, каб амэрыканцы былі ў бясьпецы ў сябе дома і за мяжой», — сказала яна.
Расейскія войскі працягваюць атакі на Ўкраіну. Ракеты паражаюць цывільную інфраструктуру і выклікаюць маштабныя разбурэньні ў краіне.
«Без дадатковай дапамогі ЗША і Эўропы ў сфэры бясьпекі абарону і насельніцтва Ўкраіны чакае разруха», — сказала Ўоландэр.
«Дзякуючы лідэрству ЗША ў Кантактнай групе ў пытаньнях абароны Ўкраіны мы далі Ўкраіне дапамогу ў сфэры бясьпекі на суму больш як 88 мільярдаў даляраў», — сказала яна.
Па словах Ўоландэр, Расея расплачваецца за гэта тым, што Пуцін мусіў укласьці ў вайну больш за 211 мільярдаў даляраў, пры тым што краіна насамрэч ня можа дазволіць сабе такіх выдаткаў.
Расейскія вайскоўцы таксама нясуць вялікія страты.
«Страты расейскіх узброеных сілаў таксама склалі сама меней 315 тысяч чалавек, — сказала Ўоландэр. — Тым ня менш праз апантанасьць Пуціна Расея яшчэ доўгія гады будзе пагрозай для бясьпекі Эўропы і ЗША».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
