Пра гэта паведамляе «Голас Амэрыкі» са спасылкай на сумесную заяву Дзяржаўнага дэпартамэнту і Міністэрства фінансаў ЗША.
- Упраўленьне кантролю за замежнымі актывамі Міністэрства фінансаў уключыла ў сьпіс кампанію «Агенцтва сацыяльнага праектаваньня» і яе заснавальніка Ільлю Гамбашыдзэ і Company Group Structura LLC («Структура») і яе генэральнага дырэктара Мікалая Тупікіна.
Паводле Мінфіну, вышэйзгаданыя фірмы стварылі ад імя ўраду РФ сетку больш як з 60 вэбсайтаў, якія выдавалі сябе за навінныя арганізацыі, што дзейнічаюць у Эўропе, і выкарыстоўвалі падробленыя акаўнты ў сацыяльных сетках для распаўсюджваньня дэзынфармацыі.
«Зробленыя сёньня захады адлюстроўваюць нашы пастаянныя намаганьні па супрацьдзеяньні шкоднасным апэрацыям Крамля, — гаворыцца ў заяве Мілера. — Мы працягваем выкрываць намаганьні Расеі па ўвядзеньні аўдыторыі ў зман з дапамогай кампаній, накіраваных на распаўсюджваньне хлусьні, якія вядуцца (расейскай) дзяржавай. Злучаныя Штаты па-ранейшаму адданыя стрымліваньню і спыненьню неаднаразовых спроб Крамля падарваць дэмакратыю».
Паводле паведамленьня Мінфіну, Масква выкарыстоўвае цэлы шэраг інструмэнтаў, у тым ліку зламысныя кампаніі ўплыву і незаконную кібэрнэтычную дзейнасьць, каб падарваць інтарэсы ЗША, іх саюзьнікаў і партнэраў, у тым ліку — у Лацінскай Амэрыцы, на Блізкім Усходзе і ў Эўропе. У гэтых намаганьнях Расея рэгулярна выкарыстоўвае свае выведныя службы, пасярэднікаў і інструмэнты ўплыву.
У заяве Мінфіну падкрэсьліваецца, што РФ зьвяртаецца да ўсё больш дасканалых мэтадаў, імкнучыся схаваць сваё дачыненьне да падобных дзеяньняў і ствараючы шырокую сетку расейскіх проксі-сайтаў, асоб і арганізацый, якія хлусьліва выдаюць сябе за незалежныя інфармацыйныя крыніцы.
