«Прадугледжваецца, што ў пілётным праекце паэтапнага ўвядзеньня адзінай школьнай формы возьмуць удзел больш як 40 тысяч дзяцей з 50 установаў адукацыі Менску», — паведамляе прэс-служба ведамства.
У «Беллегпраме» распрацавалі тры варыянты школьнай формы для розных узроставых груп:
- малодшая школьная група (1–4 клясы);
- старэйшая школьная група (5–8 клясы);
- падлеткавая школьная група (9–11 клясы).
«Выпрабоўваць» новую школьную форму пачнуць вучні сярэдняй школы № 48 і гімназіі № 36 у Менску. З улікам заўваг і прапановаў калекцыю дапрацуюць, паабяцалі ў «Беллегпраме».
На прэзэнтацыі калекцыі прысутнічалі старшыня Савету Рэспублікі Натальля Качанава, старшыня Менгарвыканкаму Ўладзімер Кухараў, яго намесьніца Надзея Лазарэвіч, міністар адукацыі Андрэй Іванец і старшыня канцэрну «Беллегпрам» Тацяна Лугіна.
Ідэю ўвесьці аднолькавую для ўсіх школьнікаў форму Менгарвыканкам агучыў улетку 2023 году. Тады плянавалі стварыць 5–10 мадэляў адзінай школьнай формы. Таксама плянавалася, што на форме будзе чырвона-зялёная сымболіка, якая, на думку ідэолягаў, дапаможа дзецям усьвядоміць «сваю прыналежнасьць да гэтай дзяржавы».
На фота цяперашніх узораў формы прысутнічае круглая нашыўка ў чырвона-зялёных колерах, але цяжка разгледзець дакладна, што на ёй намалявана.
