Расейскія войскі пасьля захопу Аўдзееўкі ў Данецкай вобласьці працягваюць наступ на гэтым кірунку. Вайсковае кіраўніцтва Ўкраіны сьцьвярджае, што ўкраінскае войска адышло на добра падрыхтаваныя пазыцыі.
Па ўсёй ліні фронту за апошні дзень адбылося 80 баявых сутыкненьняў.
Расейцы спрабуюць прасунуцца на ўсходзе і вярнуць страчаныя пазыцыі на поўдні
У Генэральным штабе Ўзброеных сіл Украіны паведамілі, што на аўдзееўскім кірунку ўкраінскія войскі змаглі адбіць пяць атак каля Новабахмутаўкі, Ластачкіна і Первамайскага Данецкай вобласьці.
Украінскі вайсковы карэспандэнт Юрый Бутусаў расказаў, як расейцы пасьля захопу Аўдзееўкі расправіліся зь цяжкапараненымі ўкраінскімі вайскоўцамі — іх не змаглі вывезьці пры выхадзе за захопленага горада.
«Расейскія вайскоўцы расстралялі бездапаможных няўзброеных параненых, якіх захапілі ў палон і якія не маглі перасоўвацца. Целы скінулі ў ваду», — паведаміў журналіст.
Разам з такімі «зачысткамі» ў Аўдзееўцы Расея павялічыла колькасьць авіяцыйных атак на памежжа ў Харкаўскай вобласьці, а таксама на прыфрантавыя населеныя пункты ў Данецкай, Луганскай і Запароскай абласьцях. На Запарожжы расейцы спрабавалі атакаваць Рабоціна, якое яны страцілі ў жніўні 2023 году. Украінцы сьцьвярджаюць, што змаглі адбіць гэты расейскі наступ.
Інстытут вывучэньня вайны: хаатычнага адступленьня ўкраінцаў не было
У амэрыканскім Інстытуце вывучэньня вайны (ISW) сьцьвярджаюць, што ўкраінскія войскі адышлі на падрыхтаваныя пазыцыі недалёка ад Аўдзееўкі, хоць расейскія СІМ сьцьвярджаюць, што адступленьне было хаатычным.
«Даступныя здымкі, якія ISW не будзе прадстаўляць або апісваць больш падрабязна на цяперашні момант, каб захаваць апэратыўную бясьпеку Ўкраіны, не пацьвярджаюць сьцьвярджэньня аб тым, што ўкраінскія сілы ня маюць падрыхтаваных абарончых пазыцый на захад ад Аўдзееўкі», — адзначаецца з справаздачы Інстытуту за 18 лютага.
Экспэрты таксама падкрэсьлілі, што ўкраінскае камандаваньне таксама нядаўна накіравала новыя падразьдзяленьні на фронт у Аўдзееўку для контратак і стварэньня калідору для эвакуацыі ўкраінскіх войскаў.
«Цяпер расейскія войскі вядуць як мінімум тры наступальныя апэрацыі — уздоўж мяжы Харкаўскай і Луганскай вобласьці, у прыватнасьці, у кірунках Купянску і Лімана, у Аўдзееўцы і яе ваколіцах, а таксама каля Рабоціна на захадзе Запароскай вобласьці», — адзначылі экспэрты.
Паводле іх, цяпер Расея спрабуе скарыстацца «паўзай» у заходняй вайсковай дапамозе Ўкраіне, каб вярнуць страчаныя цягам 2023 году пазыцыі на ўсходзе і поўдні. Але экспэрты перакананыя, што расейскай арміі будзе гэта вельмі цяжка зрабіць.
На поўначы, усходзе і поўдні Ўкраіны ёсьць загінулыя і параненыя
У апэратыўным камандаваньні «Поўнач» паведамілі, што за апошнія содні Расея выпусьціла па Чарнігаўскай і Сумскай абласьцях да 30 снарадаў.
У Харкаўскай вобласьці адзін чалавек загінуў і сем атрымалі раненьні, у Данецкай вобласьці — мінімум 2 чалавекі атрымалі раненьні.
Расейцы нанесьлі 402 удары па 12 населеных пунктах Запароскай вобласьці, і 21 — па Херсону і Херсонскай вобласьці. Улады пакуль не паведамляюць аб ахвярах.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
