«У Беларусі ВРІ і грып характарызуюцца сярэдняй інтэнсіўнасьцю. За мінулы каляндарны тыдзень колькасьць новых выпадкаў вырасла на 33% у параўнаньні з папярэднім тыднем», — сказала Іна Кандрэскул і параіла памятаць пра захаваньне правілаў асабістай гігіены, рэсьпіраторнага этыкету, вакцынацыі супраць адру, грыпу і іншых хваробаў.
57% хворых, паводле лекаркі, — гэта дзеці. Асабліва рызыкуюць захварэць дзеці да трох гадоў, а таксама людзі, старэйшыя за 65 гадоў, і асобы з хранічнымі хваробамі.
Часьцей за ўсё менчукі сутыкаюцца з адэнавірусамі, вірусамі парагрыпу і іншымі негрыпознымі рэсьпіраторнымі інфэкцыямі. Ёсьць адзінкавыя выпадкі грыпу А.
Галоўная лекарка Менскага гарадзкога цэнтру гігіены і эпідэміялёгіі Іна Кандрэскул таксама параіла менчукам падумаць пра прышчэпку ад сэзоннага грыпу. Паводле яе, вакцыны ёсьць ува ўсіх менскіх установах аховы здароўя.
- Раней сёньня стала вядома, што ў Наваполацкай папраўчай калёніі № 1 узьнікла ўспышка грыпу. Пра гэта паведаміў праваабарончы тэлеграм-канал «MAYDAY TEAM».
- Згодна з паведамленьнем, мэдчастка калёніі перапоўненая, а ў некаторых атрадах (2-м і 10-м) прастудныя захворваньні мае палова асуджаных. Гэта сотні чалавек.
