У Беларусі ў чацьвёртым квартале 2023 году ўзровень беспрацоўя, разьлічаны ў адпаведнасьці з мэтадалёгіяй Міжнароднай арганізацыі працы, павялічыўся на 0,1 працэнтнага пункту ў параўнаньні з трэцім кварталам і склаў 3,5% супраць 3,4%, паведамляе Нацыянальны статыстычны камітэт па выніках рэгулярнага выбарачнага абсьледаваньня хатніх гаспадарак.
Паведамляецца, што беспрацоўнымі зьяўляюцца 4% мужчын і 2,9% жанчын. У гарадах ня мае працы 3,3% насельніцтва ў працаздольным узросьце, у сельскай мясцовасьці — 4%.
Паводле зьвестак Белстату, 60,2% беспрацоўных шукаюць працу ў СМІ і інтэрнэце, 56,1% зьвяртаюцца да сяброў, сваякоў і знаёмых, 15% — у службу занятасьці і агульнарэспубліканскі банк вакансій, 17,9% — непасрэдна да працадаўцаў.
У эканоміцы Беларусі ў лістападзе 2023 году было занята 4 млн 140,5 тыс. чалавек — на 2,8 тыс. менш (0,07%), чым месяцам раней (4 млн 143,3 тыс.).
