Увечары 16 студзеня ў вёсцы Каробчына на Мсьціслаўшчыне адбылося ўзгараньне дома. У выніку пажару загінулі 34-гадовы мужчына і ягоны 4-гадовы пасерб.
Сьледчы камітэт высьветліў, што ўвечары маці пайшла на працу, у доме заставаўся сужыцель з дваімі дзецьмі: 4-гадовым хлопчыкам і 10-гадовай дзяўчынкай. Мужчына каля месяца не працаваў, глядзеў малодшае дзіця, бо хлопчык не хадзіў у дзіцячы садок.
Калі здарыўся пажар, усе ў доме спалі. Прачнулася дзяўчынка і паспрабавала выцягнуць брата з дому, але ёй гэтага не ўдалося. Яна кінулася да суседзяў па дапамогу, аднак яны ў дом зайсьці ўжо не змаглі і выклікалі пажарнікаў.
Цяпер дзяўчынка знаходзіцца ў шпіталі ў вельмі цяжкім стане.
Суседзі характарызуюць сям'ю здавальняюча, зазначаючы аднак, што мужчына курыў і выпіваў. Напярэдадні здарэньня ён ужываў сьпіртное.
Сьледчыя не выключаюць, што да пажару магло прывесьці неасьцярожнае абыходжаньне з агнём пры курэньні. Праверка працягваецца.
