У кампаніі «Київстар», якая 12 сьнежня пацярпела ад моцнай хакерскай атакі, паведамілі аб частковым аднаўленьні паслугаў фіксаванай сувязі.
«Цяпер спэцыялісты працуюць над аднаўленьнем іншых паслугаў і зробяць усё магчымае, каб канчаткова завершыць гэтую працу 13 сьнежня. Аднаўленьне сэрвісаў будзе адбывацца паступова», — адзначаецца ў афіцыйным паведамленьні кампаніі.
Раніцай 13 сьнежня расейская хакерская група «Солнцепёк» заявіла аб сваёй адказнасьці за атаку на ўкраінскага мабільнага апэратара. Расейскія хакеры сьцьвярджаюць, што «зьнішчылі 10 тысяч кампутараў, больш за 4 тысячы сэрвэраў, усе сыстэмы захоўваньня зьвестак у „аблоках“, а таксама рэзэрвовага капіяваньня».
Хакеры патлумачылі сваю атаку на «Київстар» тым, што гэтая кампанія забясьпечвае сувязьзю Ўзброеныя сілы Ўкраіны. У якасьці доказаў яны апублікавалі здымкі скрадзеных пэрсанальных зьвестак кліентаў украінскай кампаніі, і паведамілі, што ім нібыта дапамаглі «неабыякавыя супрацоўнікі» кампаніі «Київстар».
У Службе бясьпекі Ўкраіны заявілі, што кваліфікуюць гэтыя дзеяньні расейскіх хакераў «як чарговае ваеннае злачынства». Згодна з афіцыйным паведамленьнем украінскай спэцслужбы, гэтая хакерская група зьяўляецца «падразьдзелам» Галоўнага выведнага ўпраўленьня Расеі.
Раней гэтая хакерская групоўка неаднаразова атакавала сайты дзяржаўных устаноў і банкаў Украіны, а таксама ўкраінскіх СМІ.
У выніку атакі ў некаторых украінскіх гарадах не працавала сыстэма апавяшчэньня паветраных трывогаў. Расейскія войскі ў ноч на 13 сьнежня зноў інтэнсіўна абстралялі ўкраінскую сталіцу і Адэскую вобласьць.
