Сілавікі затрымалі галоўную рэдактарку сьветлагорскага тэлеканала «Ранак» Юлію Даўлетаву, а таксама карэспандэнтку Людмілу Андэнку, напісаў у Facebook былы супрацоўнік канала Андрэй Ліпскі.
Паводле інфармацыі экс-супрацоўніка, галоўную рэдактарку дапыталі ў мясцовым аддзеле Сьледчага камітэту, пасьля чаго адправілі ў ІЧУ Жлобіна. Таксама ў ІЧУ зьмясьцілі і Людмілу Анденку.
Родным самога Андрэя Ліпскага сілавікі тэлефанавалі з патрабаваньнямі даць доступ у ягоную кватэру ў Сьветлагорску.
Паводле «Вясны», Даўлетаву і Андэнку затрымалі ў межах крымінальнай справы паводле артыкулу аб садзейнічаньні экстрэмісцкай дзейнасьці (артыкул 361-1КК).
У верасьні МУС прызнаў тэлеканал «Ранак» «экстрэмісцкім фармаваньнем».
12 чэрвеня ў Сьветлагорску сілавікі ўжо затрымлівалі васьмярых супрацоўнікаў «Ранку». Затрыманых супрацоўнікаў судзілі за распаўсюд «экстрэмісцкіх» матэрыялаў (частка 2 артыкулу 19.11 КаАП).
20 чэрвеня Мінінфарм заблякаваў сайт сьветлагорскага тэлеканала, а ў ліпені сацсеткі і сайт прызналі «экстрэмісцкімі» матэрыяламі.
У жніўні сілавікі затрымлівалі і рэдактарку тэлеканала Юлію Даўлетаву.
