У Бранску ў гарадзкой гімназіі вучаніца восьмай клясы прынесла з сабой агнястрэльную зброю, зь якой выстраліла некалькі разоў.
Як паведамляюць расейскія СМІ, у выніку два чалавекі загінулі і чатыры атрымалі раненьні. Сама школьніца пасьля страляніны застрэлілася.
Паводле Міністэрства ўнутраных справаў, матывы і абставіны здарэньня цяпер высьвятляюць. Усіх вучняў з будынку школы эвакуавалі.
Пазьней дэпутат, колішні дарадца кіраўніка Расгвардыі Аляксандар Хінштэйн паведаміў, што школьніца страляла з паляўнічай зброі «Бекас-3», якая належыць яе бацьку.
«Зброя была схаваная ў тубусе. Загінула адна аднаклясніца, паранены яшчэ чатыры чалавекі. Сама школьніца застрэлілася», — паведаміў Аляксандар Хінштэйн.
Празь некаторы час бацьку школьніцы, якая ўчыніла страляніну, затрымалі — яго даставілі на допыт да сьледчых, паведамляе ТАСС. У кватэры мужчыны праходзіць ператрус.
Тэлеграм-канал Shot піша, што затрыманага завуць Дзьмітры. Напярэдадні здарэньня яму споўнілася 53 гады. Паводле інфармацыі канала, раней ён працаваў ахоўнікам у прыватным ахоўным прадпрыемстве.
