«Я ня ведаю, хто гэта публікуе, і навошта гэта робіцца... Усе ведаюць маё стаўленьне, яно супадае са стаўленьнем украінскага грамадзтва. Ніхто ня цісьне на мяне сёньня. Спачатку ўсё гэта было: у пачатку вайны і да вайны. На сёньняшні дзень ніхто ня цісьне зь лідэраў ЭЗ, Злучаных Штатаў і т. д., сярод нашых партнэраў, каб мы зараз селі з Расеяй размаўляць і нешта ёй аддаваць — ня будзе такога», — заявіў Зяленскі 4 лістапада на сумеснай прэсавай канфэрэнцыі з прэзыдэнтам Эўракамісіі Уршуляй фон дэр Ляен у Кіеве.
Прэзыдэнт таксама заявіў, што ня лічыць сытуацыю на фронце патавай.
«Гэта — ня патавая сытуацыя, яшчэ раз падкрэсьліваю... Расея кантралюе неба. А мы беражэм нашых вайскоўцаў. І калі яна кантралюе неба, проста кідаць, як Расея кідае, як мяса, сваіх людзей, ніхто ня хоча», — сказаў Зяленскі, камэнтуючы артыкул у часопісе The Economist галоўнакамандуючага ЎСУ Валерыя Залужнага.
У ім генэрал заявіў, што вайна пераходзіць на новы этап «пазыцыйнай вайны», што можа пайсьці на карысьць Расеі. Паводле яго слоў, без узмацненьня тэхналягічнай перавагі «хутчэй за ўсё, ня будзе глыбокага і прыгожага прарыву» на фронце. Залужны пісаў, што ён верыў у тое, што прэзыдэнт Расеі Ўладзімір Пуцін зьменіць курс пасьля страты прыкладна 150 000 вайскоўцаў — «у любой іншай краіне такія ахвяры спынілі б вайну».
«Як перамагчы гэта? F-16, рашэньне ёсьць, трэба чакаць, калі хлопцы навучацца, калі яны вернуцца... Хуткія рашэньні... Калі на фронце ёсьць СПА, вайскоўцы ідуць наперад, бягуць, едуць, выкарыстоўваюць тэхніку і ідуць контрнаступальныя дзеяньні», — сказаў Зяленскі.
Ён адзначыў, што летась усе лічылі, што ўкраінскія сілы — у патавай сытуацыі. Але «некалькі ўпэўненых хітрыкаў, тактык ваенных апэрацый, і вы памятаеце, Харкаўскі рэгіён быў вызвалены, частка, і вы памятаеце, што было ў Херсоне», — сказаў кіраўнік дзяржавы.
«Таму ёсьць цяжкасьці, ёсьць розныя меркаваньні... Я лічу, што мы ня маем права апускаць рукі. Якая альтэрнатыва?... Што трэба — аддаць траціну нашай дзяржавы? Гэта ж будзе толькі пачатак. Ён гэтым ня скончыць. Мы ведаем, што такое замарожаны канфлікт, мы ўжо для сябе зрабілі высновы», — дадаў Зяленскі.
Ён падкрэсьліў, што трэба больш працаваць з партнэрамі па СПА, «разблякаваць неба, даць магчымасьць нашым байцам правесьці адпаведныя наступальныя дзеяньні».
Раней сёньня амэрыканскі тэлеканал NBC News са спасылкай на двух чыноўнікаў ЗША — аднаго цяперашняга і аднаго былога — паведаміў, што прадстаўнікі ЗША і Эўразьвязу пачалі абмяркоўваць з Украінай магчымыя мірныя перамовы з Расеяй для спыненьня вайны
Як паведамляюць, некаторыя далікатныя абмеркаваньні адбыліся ў кастрычніку на сустрэчы Кантактнай групы па абароне Ўкраіны, у якую ўваходзяць больш за 50 краін. Па словах суразмоўцаў тэлеканала, у размовах закраналі тое, ад чаго ўкраіне, магчыма, давядзецца адмовіцца, каб дасягнуць пагаднення.
Як заявілі чыноўнікі, NATO гатовае прапанаваць Украіне некаторыя гарантыі бясьпекі, якія ўтрымаюць Расею ад новага ўварваньня на яе тэрыторыю.
Крыніцы тэлеканала адзначылі, што абмеркаваньні пачаліся на фоне асьцярог ЗША і краін Эўропы, што вайна зайшла ў тупік і што яны ня змогуць і надалей аказваць дапамогу Украіне. Пры гэтым адміністрацыя Байдэна ня бачыць ніякіх прыкмет таго, што прэзыдэнт Расеі Ўладзімір Пуцін гатовы да перамоваў з Украінай, адзначаюць суразмоўцы NBC News. Па іх словах, заходнія чыноўнікі кажуць, што Пуцін спадзяецца «пераседзець Захад» ці працягваць барацьбу, пакуль заходнія краіны не вырашаць перастаць аказваць ваенную дапамогу Украіне ці пакуль гэтая дапамога не стане занадта дарагой.
Па словах чыноўнікаў, у Украіны ёсьць час да канца гэтага году ці крыху больш, пасьля чаго пачнуцца «тэрміновыя дыскусіі аб мірных перамовах». Публічна прадстаўнікі ЗША адмаўляюць, што падштурхоўваюць Украіну да перамоваў і што такія абмеркаваньні наогул зь ёй вядуцца.
Амэрыканскі інстытут Gallup, які займаецца дасьледаваньнем грамадзкай думкі, 9 кастрычніка апублікаваў вынікі апытаньня жыхароў Украіны адносна вайны і розных палітычных аспэктаў. Па дадзеных кампаніі, украінцы застаюцца глыбока адданымі перамозе ў вайне з Расіяй.
Трое зь пяці (60%) украінцаў, апытаных у ліпені і жніўні, заявілі, што хочуць, каб Украіна працягвала барацьбу да перамогі, што ўдвая перавышае колькасьць тых, хто хоча, каб Украіна ішла на перамовы аб хутчэйшым спыненьні вайны (31%). Практычна ўсе ўкраінцы згаджаюцца з тым, што выйграць вайну азначае вярнуць усе тэрыторыі, якія Расея забрала пад свой кантроль з 2014 году.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
