Сьпікер Паветраных сіл Украіны Юры Ігнат заявіў, што пагроза нанясеньня Расеяй ракетных удараў з тэрыторыі Беларусі па Ўкраіне ўсё яшчэ застаецца.
«Мы ня маем ніякіх ілюзій, што нічога не адбудзецца. Расея там трымае зэнітна-ракетныя комплексы, яна там трымае «Іскандэры», авіяцыю, хоць і не ў такой вялікай колькасьці, як гэта было з пачатку поўнамаштабнага ўварваньня. Але Беларусь пакуль яшчэ саюзная дзяржава, і мы робім высновы і ўзмацняемся», — сказаў Юры Ігнат у эфіры ўсеўкраінскага тэлемаратону #UAРазом.
Сьпікер Паветраных сіл Украіны дадаў, што ўкраінскі бок узмацняе сваімі войскамі тэрыторыю на паўночнай мяжы, супрацьпаветраную абарону, ставіць загароды розных тыпаў і, у тым ліку, праводзіць мінаваньне памежнай тэрыторыі.
«Працягласьць лініі фронту вялікая — больш за 2 тысячы кілямэтраў, улічваючы Прыднястроўе, Беларусь, Расею і лініі баявых сутыкненьняў на марскіх межах. Усё гэта лінія фронту, і з гэтай лініі фронту можа прыляцець. Таму ніякіх ілюзій тут не павінна быць. Мы ўзмацняем гэтыя кірункі», — падкрэсьліў ён.
Юры Ігнат дадаў, што ўкраінская выведка адсочвае сытуацыю з правядзеньнем у Беларусі вайсковых вучэньняў, у тым ліку і тых, пра якія абвясьцілі сёньня, з выкарыстаньнем авіяцыі.
«Мы маем інфармацыю з уласных крыніц, маем інфармацыю ад нашых партнэраў, якія побач зь Беларусьсю.[...] Мы атрымліваем інфармацыю зь іншых краін аб паветранай абстаноўцы і выведцы. Ну праводзяць там нейкія вучэньні — гэта неад’емная частка існаваньня любога войска, ягонай жыцьцядзейнасьці, таму армія заўсёды жыве баявой падрыхтоўкай. Гэта няспынны працэс», — адзначыў сьпікер Паветраных сіл Украіны Юры Ігнат.
Міністэрства абароны 3 кастрычніка абвясьціла аб пачатку чарговага этапу праверкі баявой здольнасьці Ўзброеных сіл з выкарыстаньнем авіяцыі.
Аляксандар Лукашэнка падтрымаў расейскае ваеннае ўварваньне ва Ўкраіну 24 лютага 2022 году і дазволіў скарыстаць тэрыторыю, вайсковую інфраструктуру і паветраную прастору Беларусі для ўварваньня расейскай арміі і абстрэлаў гарадоў Украіны, ахвярамі якіх сталі дзясяткі тысяч мірных украінцаў.
У першыя дні поўнамаштабнай вайны ўрад Украіны пастанавіў закрыць усе памежныя пункты зь Беларусьсю. Пасьля адыходу расейскіх войскаў з Кіеўскай і Чарнігаўскай вобласьцяў між краінамі працуе толькі адзін пункт пропуску – у Валынскай вобласьці. Празь яго ва Ўкраіну вяртаюцца ўкраінцы, якіх незаконна вывезьлі ў Расею.
Праз падтрымку Аляксандрам Лукашэнкам агрэсіі Расеі супраць Украіны датычна да Беларусі ўвялі міжнародныя санкцыі.
Увесь час ад моманту расейскага ўварваньня ва Ўкраіну на тэрыторыі Беларусі амаль бесьперапынна праводзяцца вайсковыя вучэньні.
