Сьледчыя зьвярнуліся да Кіева па дапамогу ў расьсьледаваньні, але пакуль не атрымалі адказу.
Інцыдэнт адбыўся ў вёсцы Пшэводаў 15 лістапада 2022 году. Ракета ўпала на польскую тэрыторыю падчас расейскага ўдару па цэлях на захадзе Ўкраіны. У Польшчы было склікана экстранае паседжаньне Рады бясьпекі, прэзыдэнт Анджэй Дуда на наступны дзень на паседжаньні ўраду назваў тое, што здарылася, няшчасным выпадкам.
Расьсьледавальнікі прыйшлі да высновы, што ракета, якая ўпала ў Пшэводаве, — расейскай вытворчасьці, запушчаная сіламі ўкраінскай СПА з комплексу С-300. Дзеля большай эфэктыўнасьці ракеты запускаліся парамі. Адна зь іх трапіла ў цэль падчас расейскага абстрэлу, другая — не. Яна павінна была выбухнуць у паветры, але мэханізм самаліквідацыі не спрацаваў.
Па дадзеных польскай газэты, сьледзтва ведае, зь якой пазыцыі СПА была запушчана ракета. Заключэньне падрыхтаванае на аснове мноства крыніц, гаворыцца ў матэрыяле, у тым ліку тэхнічнай экспэртызы і інфармацыі спэцслужбаў. У матэрыяле сьцьвярджаецца, што ўкраінскі бок ня быў дапушчаны да расьсьледаваньня і ня стаў зь ім супрацоўнічаць.
Прэс-сакратар нацыянальнай пракуратуры заявіў газэце «Rzespospolita», што ня можа камэнтаваць дадзеныя сьледзтва. Пры гэтым збор доказаў скончаны, кажа ён. Варшава зьвярнулася да Ўкраіны па юрыдычную дапамогу і чакае адказу.
Раней прадстаўнікі Кіева выказвалі сумневы ў паведамленьні аб прыналежнасьці ракеты ўкраінскім вайскоўцам. Прэзыдэнт Уладзімір Зяленскі ў тэлезвароце наўпрост абвінавачваў Маскву ў ракетным удары па краіне NATO.
