Паводле Сьвірыдзенкі, Украіне «прынцыпова важна даказаць, што асобныя дзяржавы – сябры ЭЗ ня могуць забараняць імпарт украінскіх тавараў».
«Мы спадзяёмся, што гэтыя дзяржавы здымуць свае абмежаваньні і нам не давядзецца доўга высьвятляць адносіны ў судах. Нам патрэбна салідарнасьць зь імі і абарона інтарэсаў фэрмэраў. Прынятыя намі крокі і ціск Эўракамісіі і іншых дзяржаў-членаў дапамогуць аднавіць нармальны гандаль паміж Украінай і суседнімі дзяржавамі, а таксама паказаць салідарнасьць паміж намі», — адзначыла міністарка.
Паводле яе, у выніку аднабаковай забароны на імпарт украінскай аграпрадукцыі з боку Польшчы, Славаччыны і Вугоршчыны ўкраінскія экспартэры «ўжо панесьлі і працягваюць несьці значныя страты праз прастой, дадатковыя затраты і немагчымасьць выканаць замежнаэканамічныя пагадненьні».
Украіна, як падкрэсьліла Сьвірыдзенка, «бачыць у гэтым парушэньне Польшчай, Вугоршчынай і Славаччынай сваіх міжнародных абавязаньняў». Таксама ўкраінскі бок лічыць, што аднабаковыя дзеяньні краін – сяброў ЭЗ у сфэры гандлю «непрымальныя і ўсе краіны – члены блёку павінны каардынаваць і ўзгадняць гандлёвую палітыку, паколькі ён адносіцца да выключнай кампэтэнцыі ЭЗ».
У пятніцу, 15 верасьня, Эўракамісія адмяніла эмбарга на пастаўку ўкраінскага збожжа ў краіны ЭЗ. У Эўракамісіі прыйшлі да высновы, што дзякуючы ўведзеным у траўні 2023 году абмежаваньням на экспарт украінскага збожжа рынкавыя скажэньні ў Баўгарыі, Вугоршчыне, Польшчы, Румыніі і Славаччыне зьніклі. Акрамя таго, як адзначылі ў Эўракамісіі, узважаная палітыка ў адносінах да паставак сельгаспрадукцыі з Украіны прывяла да росту экспарту ўкраінскага збожжа з краінаў ЭЗ у трэція краіны.
У той жа час улады Польшчы, Вугоршчыны і Славаччыны заявілі, што не разблякуюць транзыт украінскай аграпрадукцыі, нягледзячы на рашэньне Эўракамісіі. Урады ўсіх трох краін растлумачылі свае дзеяньні абаронай айчынных фэрмэраў.
