Лінкі ўнівэрсальнага доступу

Кіраўнік фэдэрацыі футболу Гішпаніі абвясьціў пра адстаўку пасьля скандалу, калі ён пацалаваў футбалістку


Люіс Рубіялес і Джэні Эрмоса пасьля матчу 20 жніўня
Люіс Рубіялес і Джэні Эрмоса пасьля матчу 20 жніўня

Кіраўнік фэдэрацыі футболу Гішпаніі Люіс Рубіялес моцна абняў і пацалаваў футбалістку Джэні Эрмоса ў вусны падчас цырымоніі ўручэньня мэдалёў 20 жніўня. Спартоўка заявіла, што гэта адбылося безь яе згоды.

46-гадовы Луіс Рубіялес абвясьціў, што падасьць у адстаўку. Ён заявіў пра гэта ў нядзелю ў інтэрвію брытанскаму тэлевядоўцу Пірсу Моргану. Прычынай стаў шквал крытыкі, які абрынуўся на Рубіялеса, калі ён пацалаваў футбалістку зборнай Гішпаніі, 33-гадовую Джэні Эрмоса, пасьля перамогі гішпанак у фінале жаночага чэмпіянату сьвету.

Эпізод з пацалункам трапіў у трансьляцыю цырымоніі. У трансьляцыі з распранальні футбалістка заявіла, што тое, што здарылася, ёй не спадабалася. Рубіялес пажартаваў, што ажэніцца зь ёю.

Яго дзеяньні адразу ж асудзілі многія спартоўцы, спартовыя функцыянэры і спартовыя прафсаюзы. Празь некалькі дзён гішпанская жаночая футбольная ліга выпусьціла заяву, што Рубіялес «азмрочыў ганебным жэстам адзін з найвялікшых подзьвігаў у гісторыі гішпанскага спорту».

Арганізацыя назвала тое, што здарылася, беспрэцэдэнтнай міжнароднай ганьбай.

«Калі сьвет павінен быў зьвярнуць увагу на нашых футбалістак, прэзыдэнт прымусіў увагу ўсяго сьвету засяродзіцца на сваёй маскуліннасьці», — гаварылася ў заяве.

Міжнародная фэдэрацыя ФІФА адхіліла Рубіялеса ад пасады на 90 дзён. Ягонай адстаўкі запатрабавалі многія гішпанскія палітыкі і публічныя асобы. Ён сьцьвярджаў, што Эрмоса была згодная на пацалунак, а сам ён стаў ахвярай «ілжэфэмінізму». Эрмоса згоду адмаўляе і зьвярнулася ў паліцыю.

Спартоваму функцыянэру пагражае судовы перасьлед. Гішпанская пракуратура вядзе папярэдняе расьсьледаваньне, каб вызначыць, ці быў інцыдэнт сэксуалізаваным злачынствам.

Ігар Лосік Кацярына Андрэева Ірына Слаўнікава Марына Золатава
XS
SM
MD
LG