У матчы адборачнага турніру да чэмпіянату Эўропы ў футболе нацыянальная зборная Беларусі згуляла ўнічыю 0:0 з камандай Андоры ў сталіцы гэтай краіны Андоры-Ла-Вэльі. За Беларусь гуляюць прафэсійныя футбалісты, большасьць андорскіх гульцоў займаецца спортам на аматарскім узроўні, а зарабляе ў іншых сфэрах.
Гэты матч стаў першым для беларусаў з новым галоўным трэнэрам — каталёнцам Карлясам Алёсам, які дагэтуль трэніраваў зборную Руанды.
Пасьля нічыйнага выніку з андорцамі беларусы ў групе I маюць 4 пункты, столькі ж, колькі і каманда Косава, і больш толькі за Андору, у якой 2 пункты. Ізраіль мае 8 пунктаў, Румынія — 9, а Швайцарыя — 11.
Засталося правесьці 5 матчаў, і Беларусь, каб прабіцца на фінальны турнір у Нямеччыну, павінна перамагаць амаль у кожным зь іх.
Раней зборная Беларусі ўжо мела праблемы з андорцамі. У 2000-м годзе Андора перамагла беларусаў зь лікам 2:0. Але той матч меў таварыскі характар і не зьяўляўся адборачным.
