Як паведамілі арганізатары, мэта фэстывалю — прадставіць Беларусь і сучасную незалежную беларускую культуру, прыцягнуць увагу нямецкай публікі да драматычных падзеяў у сучаснай Беларусі і да супраціву беларускага грамадзтва палітычнаму тэрору й дыктатуры. Фэст даее пляцоўку для выдатных беларускіх творцаў, якія былі вымушаныя пакінуць радзіму.
Таксама важная мэта фэстывалю — прадэманстраваць салідарнасьць з Украінай у яе цяперашнім супрацьстаяньні расейскай ваеннай агрэсіі і такім чынам пабудаваць мост паміж рознымі краінамі і культурамі.
Сёлета фэст адбудзецца ўжо другі раз. У праграме:
- Канцэрты гурту Лявона Вольскага Volski і этна-электроннага дуэту Šuma;
- Літаратурная імпрэза «Ці ведаеце вы зямлю пад белымі крыламі? Беларусь — litTERatuRA INCOGNITA»;
- Музычны монаспэктакль «СармаТЫ/Я», які спалучае гіп-гоп і беларускія народныя сьпевы;
- Батлейка, беларускі лялечны тэатар у выкананьні знакамітага актора і тэлевядоўцы Аляксандра Ждановіча («Маляваныча»);
- Сьпеўны, музычны і танцавальны варкшопы, прысьвечаныя беларускаму народнаму мастацтву. Наведнікі змогуць папрактыкавацца ў беларускіх народных сьпевах, паспрабаваць іграць на беларускай дудзе і навучыцца беларускім і нямецкім народным танцам.
Арганізатар фэсту — Беларуская супольнасьць RAZAM e.V., найбуйнейшае аб’яднаньне беларускай дыяспары ў Нямеччыне.
Больш падрабязна пра праграму фэстывалю можна даведацца ў сацсетках — у інстаграме і на фэйсбуку.
