Масква і Пхэньян актыўна вядуць перамовы, мэта якіх — закупкі Расеяй паўночнакарэйскіх узбраеньняў і боепрыпасаў, заявіў у сераду прадстаўнік Белага дома Джон Кірбі са спасылкай на дадзеныя амэрыканскай выведкі.
Паводле Кірбі, пытаньне аб пастаўках боепрыпасаў у Расею абмяркоўвалася падчас ліпеньскага візыту ў Пхэньян міністра абароны Расеі Сяргея Шайгу, размова ідзе аб значных аб’ёмах боепрыпасаў.
Прадстаўнік Белага дома падкрэсьліў, што продаж боепрыпасаў Расеі будзе зьяўляцца парушэньнем рэзалюцый Рады Бясьпекі ААН і нагадаў аб тым, што Паўночная Карэя некалькі разоў публічна заяўляла аб тым, што яна ня мае намеру пастаўляць узбраеньні і боепрыпасы Расеі. У сакавіку Белы дом папярэджваў аб тым, што Масква спрабавала прапанаваць Пхэньяну харч у абмен на боепрыпасы.
Злучаныя Штаты разглядаюць спробы Расеі атрымаць артылерыю і снарады ад рэжымаў-ізгояў як знак роспачы і слабасьці, заявіў Джон Кірбі.
У канцы мінулага году ЗША абвінавацілі КНДР у пастаўках ракет ПВК «Вагнэр» для выкарыстаньня іх у ходзе баёў ва Ўкраіне. Пхэньян адхіліў гэтыя абвінавачаньні. Папярэджаньні Белага дома амэрыканскія спэцыялісты разглядаюць як спробу перадухіліць продаж паўночнакарэйскіх узбраеньняў і боепрыпасаў Расеі. Аднак падобны падыход не спрацаваў у адносінах да Ірана, які пастаўляе Расеі бесьпілётнікі, нягледзячы на перасьцярогі з боку Вашынгтона.
