Маніторынгавы праект «Беларускі Гаюн» паведаміў, што колькасьць асабовага складу прыватнай вайсковай кампаніі «Вагнэр» на тэрыторыі Беларусі складае 3450-3650 наймітаў.
Паводле зьвестак праекту, з 11 ліпеня на беларускую тэрыторыю прыбылі мінімум 10 арганізаваных калён ПВК «Вагнэр», апошняя перамясьцілася 23 ліпеня.
«Усе калёны накіроўваліся і прыбылі ў намётавае мястэчка ў вёсцы Цэль пад Асіповічамі. Ацэнка заснавана на ліку тэхнікі, якая прыбыла ў Беларусь, і яе прыбыцьцё пацьвердзілі», — адзначаецца ў паведамленьні «Беларускага Гаюна».
Згодна з ацэнкамі праекта, у Беларусь перамясьцілі 670-700 адзінак аўтамабільнай тэхнікі, у тым ліку пікапы УАЗ Патрыёт (іх большасьць), Mitsubishi L200, КамАЗы «Уралы», аўтобусы, фуры і будаўнічая інжынэрная тэхніка.
22 ліпеня ў Дзяржаўнай памежнай службе Ўкраіны паведамілі, што колькасьць расейскіх наймітаў ПВК «Вагнэр» у Беларусі можа дасягаць 5 тысяч.
- ПВК «Вагнэр» — неафіцыйнае расейскае ўзброенае падразьдзяленьне, не зьвязанае зь Мінабароны РФ або іншымі дзяржструктурамі. «Вагнэраўцы» бяруць удзел у наземных апэрацыях у Сырыі, Афрыцы і ў вайне з Украінай. Наймітаў падазраюць ва ўчыненьні шматлікіх ваенных злачынстваў.
- Увечары 23 чэрвеня Прыгожын і ПВК «Вагнэр» арганізавалі ў Расеі мяцеж, які працягваўся крыху менш за суткі. Пасьля гэтага расейскія ўлады заявілі, што «Вагнэр» сыдзе ў Беларусь.
- 14 ліпеня Мінабароны Беларусі заявіла, што беларускія войскі тэрытарыяльнай абароны цяпер трэніруюць найміты ПВК «Вагнэр».
- Паводле маніторынгавага праекту «Беларускі Гаюн», калёны ПВК «Вагнэр» пачалі прыбываць у Беларусь з 11 ліпеня.
- Былы лідэр прарасейскіх сэпаратыстаў на Данбасе Ігар Стралкоў-Гіркін, цяпер арыштаваны, у сваім тэлеграм-канале, спасылаючыся на аднаго з камандзіраў ПВК «Вагнэр», кіраўніка штабу з пазыўным «Маркс», паведаміў, што ў Беларусь прыбудзе да 10 тысяч байцоў «Вагнэру».
