Пра гэта паведамляе партал Delfi.
«Фактар рызыкі прысутнічае, сытуацыя пагоршылася з-за разьмяшчэньня вагнэраўцаў у Беларусі, але гэтыя людзі з іх цяперашнім баявым патэнцыялам рэальнай ваеннай пагрозы не ўяўляюць», — сказаў агенцтву ELTA Кашчунас.
«Давайце захоўваць годнасьць і самапавагу. Гаворка ідзе аб групе ў тысячу-дзьве лёгкаўзброеных байцоў, якія цяпер нібыта кагосьці навучаюць: або імітуюць навучаньне, або на самай справе навучаюць. Несумненна, іх перамяшчэньне, відэазапісы, якія яны загружаюць, у нейкай ступені ўплываюць на інфармацыйнае поле, але гэта — лёгкаўзброеныя людзі» — падкрэсьліў палітык.
Паводле яго прысутнасьць наймітаў «Вагнэра» у Беларусі стварае пэўную рызыку, тым ня менш ён мяркуе, што яна больш выкарыстоўваецца як інфармацыйны інструмэнт для выкліканьня пэўнай рэакцыі.
«Гэтыя трэніровачкі, якія больш нагадваюць нейкую паказальную акцыю, мне здаецца, гэта больш правакаваньне нас усіх, каб нам даводзілася кожны раз камэнтаваць тое, што там адбываецца», — сказаў ён.
Старшыня соймавага камітэту ў бясьпецы ня лічыць, што ў адказ на разьмяшчэньне ў Беларусі наймітаў «Вагнэра» Літва павінна сьцягваць вайскоўцаў да мяжы або прымаць іншыя ўзмоцненыя меры. Паводле яго слоў, найлепшым адказам было б узмацненьне прысутнасьці саюзьнікаў па NATO на ўсходнім флянгу Альянсу.
«Але разьведка NATO бачыць і адрозьнівае, калі гэтая група можа і здольная нешта зрабіць, а калі не. Ці выкарыстоўваецца яна для нейкай інфармацыйнай вайны або для сур’ёзных рэчаў. Мне зараз здаецца, што гэта інфармацыйная вайна», — дадаў ён.
Найміты ПВК «Вагнэр», якія прыбылі ў Беларусь, удзельнічаюць у сумесных з беларускім войскам вучэньнях на Берасьцейскім палігоне, разьмешчаным за 40 кілямэтраў ад мяжы з Украінай і за 30 кілямэтраў ад мяжы з Польшчай.
Спроба ўзброенага мяцяжу ў Расеі. Асноўнае
- Увечары 23 чэрвеня кіраўнік ПВК «Вагнэр» Яўгеній Прыгожын заявіў, што міністэрства абароны РФ нанесла ракетныя ўдары па тылавых лягерах наймітаў і што «зло, якое нясе вайсковае кіраўніцтва краіны, будзе спынена».
- Міністэрства абароны Расеі назвала гэтыя словы «інфармацыйнай правакацыяй».
- Уначы Прыгожын паведаміў, што байцы «Вагнэра» ўвайшлі ў Расею з акупаваных раёнаў Ўкраіны.
- Раніцай 24 чэрвеня Прыгожын заявіў, што ПВК «Вагнэр» увайшла ў Растоў-на-Доне і ўзяла пад кантроль вайсковыя аб’екты Растова, у тым ліку аэрадром.
- Пазьней Прыгожын заявіў і пра ўзяцьце пад кантроль вайсковых абʼектаў у Варонежы.
- У Маскоўскай, Растоўскай і Варонескай вобласьцях РФ увялі надзвычайныя захады бясьпекі.
- У Расеі завялі крымінальную справу аб узброеным мяцяжы.
- Пуцін у ранішнім звароце заявіў, што «Расею мяцяжом спрабуюць штурхаць да паразы і капітуляцыі» і што «дзеяньні супраць мяцежнікаў будуць жорсткімі».
- Кіраўнік дэпартамэнту нацыянальнай бясьпекі ў складзе Аб’яднанага пераходнага кабінэту Валер Сахашчык у сувязі з падзеямі ў Расеі заклікаў беларусаў «выкарыстаць гістарычны шанец».
- Лідэрка дэмакратычных сілаў Беларусі Ціханоўская заклікала дыпляматаў і сілавікоў не выбіраць паміж Пуціным і Прыгожыным, а вайскоўцаў — выгнаць войскі Расеі зь Беларусі.
- Аб’яднаны пераходны кабінэт заявіў, што «дэнансуе палітычныя і ваенныя дамовы з Расеяй» і аб’яўляе аб выхадзе Беларусі з АДКБ, ЭАЭС і СНД.
- Полк Каліноўскага заклікаў грамадзянаў Беларусі рыхтавацца да «вызваленьня ад дыктатуры і акупацыі»
- Прэс-служба Аляксандра Лукашэнкі ўвечары 23 чэрвеня напісала, што той угаварыў заснавальніка ПВК «Вагнэр» Яўгенія Прыгожына спыніць прасоўваньне да Масквы.
- Пазьней Прыгожын заявіў аб завяршэньні марша і вяртаньні баевікоў у палявыя лягеры.
- Пазьней зьявілася навіна аб тым, што Прыгожын паедзе ў Беларусь, а крымінальную справу ў РФ супраць яго спыняць.
- 26 чэрвеня у Генпракуратуры Расеі паведамілі, што справу супраць Прыгожына не спынілі.
- 27 чэрвеня Аляксандар Лукашэнка пацьвердзіў прылёт у Беларусь кіраўніка ПВК «Вагнэр» Яўгенія Прыгожына. Найміты ПВК «Вагнэр», паводле Лукашэнкі, будуць працаваць у Беларусі інструктарамі, ім прапанавалі ў распараджэньне закінутую вайсковую частку.
- 2 ліпеня ПВК «Вагнэр» абвясьціла, што на месяц прыпыняе вэрбоўку ў свае шэрагі. Гэта патлумачылі часовым няўдзелам групоўкі ў вайне супраць Украіны і «пераездам у Рэспубліку Беларусь».
- У сярэдзіне ліпеня байцы ПВК сталі калёнамі прыбываць у лягер каля вёскі Цэль. Міністэрства абароны Беларусі абвясьціла пра сумесныя трэнаваньні на палігоне «Берасьцейскі».
- Былы лідэр прарасейскіх сэпаратыстаў на Данбасе Ігар Стралкоў-Гіркін у сваім тэлеграм-канале, спасылаючыся на аднаго з камандзіраў ПВК «Вагнэр», кіраўніка штабу з пазыўным «Маркс», паведаміў, што ў Беларусь прыбудзе да 10 тысяч байцоў «Вагнэру».
- Агулам у Беларусь прыехалі 12 калёнаў наймітаў. Там была і будаўнічая тэхніка.
- 23 жніўня, як паведаміла Расавіяцыя, Яўгеній Прыгожын загінуў у разьбітым самалёце пад Цьверру. Разам зь ім там быў адзін з камандзіраў ПВК «Вагнэр» Дзьмітрый Уткін.
