У Гомельскім абласным судзе 20 ліпеня пачаўся суд над мясцовым прадпрымальнікам Юрыем Ташкінавым, якога абвінавачваюць у распальваньні варожасьці і фінансаваньні дзейнасьці экстрэмісцкага фармаваньня (ч.1 арт. 130 і арт. 361-2 КК).
Судовае пасяджэньне ў закрытым рэжыме праходзіць пад старшынством судзьдзі Яўгена Піскунова.
Ташкінаў быў рэзыдэнтам Гомельскага тэхнапарка. У 2018 годзе ён распрацаваў мабільнае прыкладаньне для онлайн-пошуку выканаўцаў розных работ і паслуг.
Пасля пачатку шырокамаштабнага ўварваньня расейскіх войскаў ва Ўкраіну гамяльчук у сацсетках выказваўся супраць вайны і публікаваў справаздачы аб гуманітарнай дапамозе жыхарам Чарнігаўшчыны, якая была акупаваная напачатку вясны 2022 года.
Праўладныя тэлеграм-каналы паведамлялі пра тое, што ён пераводзіў грошы на дапамогу Ўкраіне праз фонд BYSOL.
