Старшыня Сейму Літвы Вікторыя Чміліце-Нільсэн заявіла, што ня бачыць неабходнасьці ўніфікаваць санкцыі супраць расейцаў і беларусаў.
«Мяне не пераконвае аргумэнт прэзыдэнта Наўседы аб тым, што закон трэба зьмяніць або перагледзець з прычыны прысутнасьці групоўкі „Вагнэр“ у Беларусі. Толькі таму, што расейскія грамадзяне з тэрарыстычнай групоўкі „Вагнэр“ пераедуць у Беларусь, яны ня стануць беларускімі грамадзянамі, таму да іх будуць прымяняцца тыя ж патрабаваньні, якія дзейнічалі дагэтуль», — заявіла Вікторыя Чміліце-Нільсэн 5 ліпеня ў эфіры радыёстанцыі LRT.
У той жа час сьпікерка літоўскага парлямэнту выказалася за неабходнасьць правядзеньня кансультацый з памежнай службай і іншымі дзяржаўнымі ўстановамі, якія адказваюць за бясьпеку, ці «бачаць яны ў гэтым праблему і мэтазгоднасьць больш жорсткіх нормаў закону і ягонага перагляду, і ці ўсё пад кантролем».
«Пакуль ня бачу неабходнасьці яго пераглядаць», — адзначыла Вікторыя Чміліце-Нільсэн.
Прэзыдэнт Літвы Гітанас Наўседа 4 ліпеня заявіў аб неабходнасьці ўвядзеньня аднолькавых абмежавальных мер для беларусаў і расейцаў і аргумэнтаваў гэта патэнцыйным зьяўленьнем на беларускай тэрыторыі наймітаў расейскай ПВК «Вагнэр».
«Неўзабаве давядзецца вярнуцца да гэтага пытаньня, бо каля нашых межаў могуць зьявіцца ўзброеныя людзі зь беларускім грамадзянствам, пад вопраткай якіх будуць хавацца тыя самыя вагнэраўцы. Я не палохаю, проста прапаную вельмі добра падумаць, у якой сытуацыі мы цяпер знаходзімся. Гэтыя хлопцы пэўна не адчуваюць згрызотаў сумленьня, і ў адпаведных руках яны могуць быць выкарыстаныя для якіх-небудзь зламысных мэтаў», — сказаў Гітанас Наўседа ў інтэрвію тэлеканалу LNK.
Увесну Сейм Літвы прыняў пакет нацыянальных санкцый, якія зрабілі больш строгім парадак уезду і знаходжаньня на тэрыторыі краіны, а таксама абмежавалі правы, пераважна расейскіх грамадзян. У выніку ажыўленых дыскусій беларусы пазьбеглі большасьці абмежавальных захадаў.
Гітанас Наўседа наклаў на закон вета, дамагаючыся аднолькавых абмежаваньняў для грамадзян Беларусі і Расеі, але парлямэнт адхіліў яго прапановы.
Згодна з новым законам, з 2 траўня 2023-га да 3 траўня 2024 году для грамадзян Беларусі і Расеі абмежавалі атрыманьне літоўскіх віз, электроннага статусу рэзыдэнта, а таксама ўвоз імі ўкраінскіх грыўняў.
Для грамадзян Расеі ўскладнілі магчымасьць набыцьця нерухомасьці ў Літве і спынілі прыём заяў на атрыманьне відаў на жыхарства.
Спроба ўзброенага мяцяжу ў Расеі. Асноўнае
- Увечары 23 чэрвеня кіраўнік ПВК «Вагнэр» Яўгеній Прыгожын заявіў, што міністэрства абароны РФ нанесла ракетныя ўдары па тылавых лягерах наймітаў і што «зло, якое нясе вайсковае кіраўніцтва краіны, будзе спынена».
- Міністэрства абароны Расеі назвала гэтыя словы «інфармацыйнай правакацыяй».
- Уначы Прыгожын паведаміў, што байцы «Вагнэра» ўвайшлі ў Расею з акупаваных раёнаў Ўкраіны.
- Раніцай 24 чэрвеня Прыгожын заявіў, што ПВК «Вагнэр» увайшла ў Растоў-на-Доне і ўзяла пад кантроль вайсковыя аб’екты Растова, у тым ліку аэрадром.
- Пазьней Прыгожын заявіў і пра ўзяцьце пад кантроль вайсковых абʼектаў у Варонежы.
- У Маскоўскай, Растоўскай і Варонескай вобласьцях РФ увялі надзвычайныя захады бясьпекі.
- У Расеі завялі крымінальную справу аб узброеным мяцяжы.
- Пуцін у ранішнім звароце заявіў, што «Расею мяцяжом спрабуюць штурхаць да паразы і капітуляцыі» і што «дзеяньні супраць мяцежнікаў будуць жорсткімі».
- Кіраўнік дэпартамэнту нацыянальнай бясьпекі ў складзе Аб’яднанага пераходнага кабінэту Валер Сахашчык у сувязі з падзеямі ў Расеі заклікаў беларусаў «выкарыстаць гістарычны шанец».
- Лідэрка дэмакратычных сілаў Беларусі Ціханоўская заклікала дыпляматаў і сілавікоў не выбіраць паміж Пуціным і Прыгожыным, а вайскоўцаў — выгнаць войскі Расеі зь Беларусі.
- Аб’яднаны пераходны кабінэт заявіў, што «дэнансуе палітычныя і ваенныя дамовы з Расеяй» і аб’яўляе аб выхадзе Беларусі з АДКБ, ЭАЭС і СНД.
- Полк Каліноўскага заклікаў грамадзянаў Беларусі рыхтавацца да «вызваленьня ад дыктатуры і акупацыі»
- Прэс-служба Аляксандра Лукашэнкі ўвечары 23 чэрвеня напісала, што той угаварыў заснавальніка ПВК «Вагнэр» Яўгенія Прыгожына спыніць прасоўваньне да Масквы.
- Пазьней Прыгожын заявіў аб завяршэньні марша і вяртаньні баевікоў у палявыя лягеры.
- Пазьней зьявілася навіна аб тым, што Прыгожын паедзе ў Беларусь, а крымінальную справу ў РФ супраць яго спыняць.
- 26 чэрвеня у Генпракуратуры Расеі паведамілі, што справу супраць Прыгожына не спынілі.
- 27 чэрвеня Аляксандар Лукашэнка пацьвердзіў прылёт у Беларусь кіраўніка ПВК «Вагнэр» Яўгенія Прыгожына. Найміты ПВК «Вагнэр», паводле Лукашэнкі, будуць працаваць у Беларусі інструктарамі, ім прапанавалі ў распараджэньне закінутую вайсковую частку.
- 2 ліпеня ПВК «Вагнэр» абвясьціла, што на месяц прыпыняе вэрбоўку ў свае шэрагі. Гэта патлумачылі часовым няўдзелам групоўкі ў вайне супраць Украіны і «пераездам у Рэспубліку Беларусь».
- У сярэдзіне ліпеня байцы ПВК сталі калёнамі прыбываць у лягер каля вёскі Цэль. Міністэрства абароны Беларусі абвясьціла пра сумесныя трэнаваньні на палігоне «Берасьцейскі».
- Былы лідэр прарасейскіх сэпаратыстаў на Данбасе Ігар Стралкоў-Гіркін у сваім тэлеграм-канале, спасылаючыся на аднаго з камандзіраў ПВК «Вагнэр», кіраўніка штабу з пазыўным «Маркс», паведаміў, што ў Беларусь прыбудзе да 10 тысяч байцоў «Вагнэру».
- Агулам у Беларусь прыехалі 12 калёнаў наймітаў. Там была і будаўнічая тэхніка.
- 23 жніўня, як паведаміла Расавіяцыя, Яўгеній Прыгожын загінуў у разьбітым самалёце пад Цьверру. Разам зь ім там быў адзін з камандзіраў ПВК «Вагнэр» Дзьмітрый Уткін.
