«Ва ўстановах аховы здароўя застаюцца 4 пацярпелыя, зь іх 2 — у рэанімацыі, у дваіх раненьні сярэдняй ступені цяжкасьці. 15 пацярпелым аказалі мэдычную дапамогу і адпусьцілі дадому. Сярод параненых — адно пяцігадовае дзіця», — паведамілі ў абладміністрацыі.
Украінскія СМІ апублікавалі відэа, зьнятае адным з жыхароў Сумаў. На ім відаць момант, як беспілётнік трапляе ў дом. Аўтар відэа кажа, што гэта дрон тыпу «Шахед».
Паведамляецца, што ў доме, калі туды трапіў дрон, пачаўся пажар.
Паводле інфармацыі ўкраінскіх уладаў, усяго ў панядзелак было чатыры трапляньні іранскімі бесьпілётнікамі «Шахед» па цэнтры Сумаў.
У ноч на 3 ліпеня Расея нанесла ўдары «Шахедамі» па некалькіх абласьцях Украіны. Паводле Ўзброеных сілаў Украіны, яны зьбілі 13 бесьпілётнікаў з 17.
Кіеў і краіны Захаду неаднаразова абвінавачвалі Іран у пастаўках Расеі дронаў-камікадзэ, якія ў далейшым выкарыстоўваюцца для ўдараў па Ўкраіне. Расейскія і іранскія ўлады гэта адмаўляюць. Тэгеран раней заяўляў, што накіроўваў Маскве невялікую партыю бесьпілётнікаў, але гэта было да вайны Расеі з Украінай. Кіеў рэгулярна паведамляе пра атакі на ўкраінскія населеныя пункты дронамі «Шахед».
