Украінскія войскі працягваюць наступальныя апэрацыі на некалькіх кірунках усходу і поўдня краіны, а таксама актывізуюць атакі на базы расейскай арміі на захопленых ёй тэрыторыях.
Цяжкія баі ў Запароскай і Данецкай абласьцях
Генэральны штаб Узброеных сіл Украіны паведаміў, што ўкраінскія войскі дасягнулі частковага посьпеху на мелітопальскім і бярдзянскім кірунках (Запароская вобласьць. — РС).
Мясцовыя жыхары паведамілі, што раніцай у Бярдзянску прагучала каля 10 выбухаў. Напярэдадні расейцы нібыта дысьлякавалі на мясцовы аэрадром вялікую колькасьць сваіх самалётаў.
«На флянгах гораду Бахмуту нашы войскі працягваюць ціснуць на праціўніка, выбіваюць з раней захопленых пазыцый. Маюць посьпех, замацоўваюцца. Праціўнік чыніць супраціў і мае вялікія страты. Працягваюць цяжкія баі», — адзначаецца ў паведамленьні ўкраінскага Генштабу.
Намесьніца міністра абароны Ўкраіны Ганна Маляр прызнала, што ўкраінскія вайскоўцы прасоўваюцца наперад, але гэта адбываецца вельмі цяжка і павольна.
«Нашы „выгрызаюць“ у ворага кожны мэтар зямлі ў цяжкім двубоі. Маюць посьпехі», — напісала Ганна Маляр напярэдадні ў сваім тэлеграм-канале.
У сытуацыйным цэнтры Міністэрства абароны Ўкраіны паведамілі, што за апошнія содні Расе абстраляла тэрыторыю 9 абласьцей Украіны — 102 населеныя пункты і 49 аб’ектаў інфраструктуры. Ёсьць загінулыя і параненыя сярод цывільных. «Колькасьць ахвяр удакладняецца», — адзначаецца ў паведамленьні.
ЗША: рознагалосьсі ўнутры Расеі могуць дапамагчы Ўкраіне ў наступе
Дзяржаўны сакратар ЗША Энтані Блінкен мяркуе, што нядаўні ўзброены мяцеж у Расеі можа дапамагчы Ўкраіне ў контрнаступе.
«Бяз сумневаў, ён [наступ] ідзе цяжка, таму што ў Расеі было шмат месяцаў на тое, каб выстраіць абарону», — сказаў Энтані Блінкен у інтэрвію амэрыканскаму тэлеканалу MSNBC, перадае «Голас Амэрыкі».
Паводле яго, цяпер у Маскве пераключыліся на ўнутраныя рознагалосьсі.
«І гэта можа дапамагчы. Сілы „Вагнэра“ не знаходзяцца на перадавой, і гэта можа дапамагчы, таму што яны былі неэфэктыўныя. Яны літаральна кідалі людзей у мясарубку, створаную самім Пуціным, але гэта мела пэўны эфэкт. Таму я мяркую, што ва Ўкраіны ёсьць некаторыя магчымасьці. Думаю, гэта будзе адбывацца не ў найбліжэйшыя дні, а ў наступныя тыдні і месяцы», — патлумачыў Энтані Блінкен.
У Мінабароны Расеі сьцьвярджаюць, што абстрэльваюць вайсковыя аб’екты
Міністэрства абароны Расеі нічога не паведамляе аб сваіх дасягненьнях на фронце і пераважна зьвяртае ўвагу толькі на нібыта «вельмі дакладныя» ўдары па населеных пунктах Украіны.
У прыватнасьці, паводле расейскага Мінабароны, у Краматорску ў выніку расейскага абстрэлу нібыта загінулі «два ўкраінскія генэралы, афіцэры і 20 іншаземцаў», які ваююць на баку Ўкраіны. Хоць дакладна вядома, што ў выніку расейскага ўдару па Краматорску загінулі цывільныя і атрымалі раненьні пісьменьнікі з Калюмбіі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
