Адпаведная пастанова Савета Міністраў Беларусі зьявілася 22 чэрвеня на Нацыянальным прававым інтэрнэт-партале і набывае моц праз 10 дзён пасьля апублікаваньня.
Дакумэнтам унесены зьмяненьні ў пастанову нумар 247 ад 22.04.2022 «Аб перамяшчэньні транспартных сродкаў». Раней згодна зь ёй забаранялася перамяшчэньне па тэрыторыі Беларусі грузавых аўтамабіляў і цягачоў, зарэгістраваных у дзяржавах ЭЗ, то цяпер забарона вызначана на перамяшчэньне:
- грузавых аўтамабіляў і цягачоў, зарэгістраваных у дзяржавах – сябрах Эўразьвязу;
- прычэпаў (паўпрычэпаў), зарэгістраваных у Рэспубліцы Польшча;
- легкавых аўтамабіляў, якія зарэгістраваны ў Рэспубліцы Польшча і ажыцьцяўляюць міжнародную перавозку ў адпаведнасьці з індывідуальнымі накладнымі або міжнароднымі таварна-транспартнымі накладнымі «CMR».
- Пры гэтым, як і ў выпадку з забаронай на перамяшчэньне грузавых аўтамабіляў і цягачоў, прычэпам/паўпрычэпам можна будзе прытрымлівацца ў пунктах перагрузкі/перачэпкі. Легкавым аўтамабілям, згаданым вышэй, можна будуць рухацца толькі праз пункты пропуску на беларуска-польскім участку мяжы.
Таксама дакумэнтам скарэктаваны пералік месцаў перагрузкі/перачэпкі, адпаведных ім пунктаў пропуску і АЗС, на якіх дазволена запраўляць замежныя транспартныя сродкі. Удакладняецца таксама парадак устаноўкі навігацыйных плёмб пры перавозках па тэрыторыі Беларусі.
Першага чэрвеня Польшча ўвяла забарону на ўезд зь беларускай тэрыторыі грузавых аўтамабіляў, цягачоў, прычэпаў, у тым ліку паўпрычэпаў, і аўтацягнікоў зарэгістраваных у Беларусі і Расеі.
Раней Варшава ўвяла санкцыі супраць 365 беларускіх фізычных асоб. Прозьвішчы не называюцца. Ухвалілі таксама рашэньне аб замарожваньні сродкаў 20 арганізацый і 16 іншых асоб, зьвязаных пераважна з расейскім капіталам.
Рашэньне выклікана тым, што ў Беларусі пакінулі ў сіле «драконаўскі прысуд Анджэю Пачобуту». Яно закране тых прадстаўнікоў уладаў, якія «адказныя за палітычныя рэпрэсіі, у тым ліку супраць палякаў, якія жывуць у Беларусі», гаворыцца ў заяве міністра ўнутраных спраў Марыюша Каміньскага.
Закрыцьцё пераходаў на мяжы Польшчы і Беларусі. Што варта ведаць
- У ліпені 2021 году Аляксандар Лукашэнка заявіў, што з прычыны санкцыяў Беларусь больш ня будзе стрымліваць нелегальную міграцыю ў краіны Эўразьвязу. Польшча стала адной з краін, куды кінуліся патокі мігрантаў. Рэагуючы на крызіс, Польшча, як і Літва, пачала будаваць сьцяну на мяжы зь Беларусьсю, а 9 лістапада 2021 году закрыла пераход Кузьніца Беластоцкая — Брузгі.
- У Варшаве абвінавацілі рэжым Лукашэнкі ў арганізацыі нелегальнай міграцыі ў краіны Эўразьвязу з тым, каб шантажаваць краіны ЭЗ і патрабаваць зьняцьця санкцый. Прэм’ер-міністар Польшчы Матэвуш Маравецкі выказаў упэўненасьць, што сцэнар «гібрыднай агрэсіі» супраць Эўразьвязу быў распрацаваны Менскам не самастойна, а ў шчыльнай супрацы з Масквой.
- 9 лютага 2023 году міністар унутраных спраў Польшчы Марыюш Каміньскі заявіў аб рашэньні закрыць памежны пераход Баброўнікі — Бераставіца, пачынаючы з 10 лютага. Гэта стала адказам Польшчы на палітычны прысуд журналісту Анджэю Пачобуту, актывісту польскай нацыянальнай меншасьці ў Беларусі. Яму прысудзілі 8 гадоў калёніі.
- Усяго на беларуска-польскай мяжы 6 пунктаў пропуску. З 10 лютага 2023 году зь іх толькі адзін адкрыты для легкавікоў і адзін для грузавікоў, у Берасьці.
- Берасьце (Тэрэспаль з польскага боку) — дзейнічае толькі для легкавікоў;
- Казловічы (Кукурыкі) — праезд дазволены толькі грузавым аўтамабілям;
- Брузгі (Кузьніца Беластоцкая)— закрыты ў 2021 годзе;
- Бераставіца (Баброўнікі), — закрыты з 10 лютага 2023;
- Пясчатка (Полаўцы) — не функцыянуе зь ініцыятывы польскага боку;
- Дамачава (Славатычы) — не функцыянуе зь ініцыятывы польскага боку.
- Каля Горадні працягвае працу памежны пункт зь Літвой «Прывалка — Райгардас». Ён знаходзіцца блізка да мяжы з Польшчай.
- На прэс-канфэрэнцыі ў Брусэлі 10 лютага прэм’ер-міністар Польшчы адзначыў, што ў Варшаве разглядаюць варыянт закрыцьця астатніх двух пераходаў на мяжы зь Беларусьсю. Ён заявіў, што да Беларусі «інструмэнтальна ставяцца» расейцы і Крэмль, і гэта складае вялікую пагрозу Польшчы і Ўкраіне.
- Перад закрыцьцём памежнага пераходу ў Баброўніках там затрымалі сама меней 12 мытнікаў. Гаворка, магчыма, ідзе пра хабарніцтва. Пра гэта паведаміла Gazeta Wyborcza. Інфармацыю аб затрыманьні мытнікаў выданьне атрымала ў ноч на 11 лютага, ужо пасьля закрыцьця памежнага пераходу.
- 13 лютага Памежны камітэт Беларусі паведаміў, што колькасьць аўтамабіляў за першыя выходныя пасьля закрыцьця Баброўнікаў на іншых пераходах павялічылася на 16%.
