Як адзначаецца ў заяве кіраўніка зьнешнепалітычнага ведамства ЗША, «гэтыя мужчыны і жанчыны былі арыштаваныя і зьняволеныя за ажыцьцяўленьне сваіх правоў чалавека і асноўных свабодаў дзеля ўсталяваньня дэмакратыі ў Беларусі, за пратэст супраць фальсыфікацыі выбараў або за супраціўленьне вайне Расеі супраць Украіны».
У заяве Блінкена гаворыцца, што многія з судоў над палітвязьнямі праходзілі за зачыненымі дзьвярыма, а таксама, што іх сем’і, сябры, калегі «штодня жывуць думкамі пра тое, што іх блізкія пакутуюць у турме».
Дзяржсакратар ЗША Энтані Блінкен канстатуе, што апошнім часам улады Беларусі пайшлі на спыненьне любых кантактаў з вонкавым сьветам такіх палітвязьняў, як Віктар Бабарыка, Сяргей Ціханоўскі, Мікалай Статкевіч, Марыя Калесьнікава, Максім Знак, Алесь Бяляцкі і Ігар Лосік. «Іх семʼі і законныя прадстаўнікі на працягу некалькіх месяцаў не могуць зьвязацца зь імі або пацвердзіць, дзе яны ўтрымліваюцца».
«На жаль, імёны большасьці палітвязьняў малавядомыя», — гаворыцца ў заяве кіраўніка Дзяржаўнага дэпартамэнту ЗША.
Дзяржсакратар ЗША Энтані Блінкен адзначае, што «Злучаныя Штаты падтрымліваюць народ Беларусі, які імкнецца да будучыні, заснаванай на вяршэнстве закона, павазе правоў чалавека і падсправаздачным, дэмакратычна абраным урадзе. Мы яшчэ раз заяўляем пра сваё цьвёрдае жаданьне неадкладнага і безумоўнага вызваленьня ўсіх палітычных зьняволеных, якіх трымае за кратамі рэжым Лукашэнкі, і заклікаем Беларусь выканаць свае міжнародна-прававыя абавязацельствы, а таксама абавязацельствы дзяржавы-ўдзельніцы АБСЭ».
У заяве акцэнтуецца, што Злучаныя Штаты маюць намер садзейнічаць прыцягненьню да адказнасьці вінаватых у парушэньнях правоў чалавека ў Беларусі ў тым ліку праз увядзеньне візавых абмежаваньняў і санкцый.
