22 траўня пачнецца суд над Эдуардам Бабарыкам, ён знаходзіцца пад вартай амаль 3 гады, паведамляе «Вясна».
Крымінальную справу будзе разглядаць Менскі абласны суд у выязным судовым пасяджэньні ў памяшканьні суду Менскага раёну. Першае судовае паседжаньне адбудзецца 22 траўня.
Эдуарда абвінавачваюць па шэрагу артыкулаў Крымінальнага кодэксу, у тым ліку ва ўхіленьні ад выплаты падаткаў, легалізацыі сродкаў, атрыманых злачынным шляхам, дапамозе ў арганізацыі масавых беспарадкаў і распальваньні расавай, нацыянальнай, рэлігійнай або іншай сацыяльнай варожасьці або варажнечы.
Эдуард Бабарыка быў кіраўніком ініцыятыўнай групы свайго бацькі як прэтэндэнта ў кандыдаты на пасаду прэзыдэнта. Затрымалі Эдуарда Бабарыку 18 чэрвеня 2021 году. Паўгода ён знаходзіўся ў СІЗА КДБ, пасьля яго перавялі ў менскае СІЗА-1 на вуліцы Валадарскага.
Бацьку Эдуарда Віктара Бабарыку асудзілі на 14 гадоў зьняволеньня ў калёніі ўзмоцненага рэжыму. Пакараньне ён адбывае ў Наваполацку.
