Лінкі ўнівэрсальнага доступу

Кіеў: у Расею пад выглядам аздараўленьня незаконна вывезьлі больш за 100 тысяч украінскіх дзяцей


У горадзе Гляваха Кіеўскай вобласьці пасьля расейскага абстрэлу 26 студзеня 2023. Ілюстрацыйнае фота
У горадзе Гляваха Кіеўскай вобласьці пасьля расейскага абстрэлу 26 студзеня 2023. Ілюстрацыйнае фота

За незаконную дэпартацыю ўкраінскіх дзяцей Міжнародны крымінальны суд выпісаў ордэр на арышт Уладзіміра Пуціна.

Цэнтар нацыянальнага супраціву, які зьвязваюць з украінскай выведкай, паведаміў, што з пачатку 2023 году з Данецкай і Луганскай вобласьці Ўкраіны пад выглядам неабходнасьці лячэньня і аздараўленьня вывезьлі больш як 100 тысяч украінскіх дзяцей. На праграму мэдычнага агляду, які праводзяць зьвезеныя лекары, заплянавана выдзеліць 1,4 мільярда расейскіх рублёў (каля 17 мільёнаў даляраў ЗША).

«Пасьля „агляду“ пераважнай большасьці дзяцей прадпісваюць „лячэньне“ ў Расеі, ад якога бацькі ўжо ня могуць адмовіцца, бо тады ім пагражаюць адабраць бацькоўскія правы», — адзначаецца ў паведамленьні цэнтру.

Паводле цэнтру, з пачатку году ў Данецкай вобласьці «агляд» прайшлі 75 тысяч дзяцей, зь якіх 39 тысяч вывезьлі ў Расею, а ў Луганскай вобласьці з 94 тысяч у 66 тысяч дзяцей выявілі «паталёгіі» і вывезьлі на расейскую тэрыторыю.

«Пры гэтым зафіксаваныя факты, калі лекары патрабуюць у бацькоў грошы, каб не выяўляць паталёгію», — адзначаецца ў паведамленьні.

17 сакавіка Міжнародны крымінальны суд у Гаазе выдаў ордэр на арышт прэзыдэнта Расеі Ўладзіміра Пуціна і ўпаўнаважанай у правах дзіцяці ў Расеі Марыі Львовай-Бяловай.

МКС падазрае абаіх ва ўчыненьні ваенных злачынстваў — гвалтоўных дэпартацый і перамяшчэньня насельніцтва, у прыватнасьці дзяцей, з акупаваных тэрыторый Украіны. Міжнароднае права можа расцэньваць гэта як генацыд. На сайце суду адзначана, што існуюць разумныя падставы лічыць, што Пуцін нясе асабістую адказнасьць за гвалтоўныя перамяшчэньні.

У лютым 2023 году Лябараторыя гуманітарных дасьледаваньняў (HRL) Ейльскай школы грамадзкай аховы здароўя апублікавала дасьледаваньне, у якім адзначалася, што Расея незаконна перамясьціла на сваю тэрыторыю ня менш за 6 тысяч украінскіх дзяцей у цэнтры для перавыхаваньня і ўсынаўленьня ў акупаваным Расеяй Крыме і на мацерыковай частцы Расеі. Экспэрты HRL ідэнтыфікавалі 43 такія цэнтры, у якіх утрымлівалі дзяцей, вывезеных Расеяй з Украіны пасьля ўварваньня 24 лютага 2022 году.

У пачатку 2023 году ўкраінскія ўлады заяўлялі, што Расея незаконна вывезла з Украіны каля 150 тысяч дзяцей.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
  • Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG