Камандуючы Аб’яднаных сіл Узброеных сіл Украіны Сяргей Наеў, які ажыцьцяўляе кіраўніцтва войскам на паўночных межах Украіны, заявіў, што ў Беларусі на вучэньнях знаходзіцца яшчэ больш як 4 тысячы расейскіх мабілізаваных.
«Цяпер наземны расейскі кампанэнт налічвае больш за 4 тысячы асобаў — гэта пераважана мабілізаваныя грамадзяне Расеі, якія праходзяць трохмесячны курс падрыхтоўкі ў складзе падразьдзелаў тэрытарыяльных войскаў Расеі пад кіраўніцтвам беларускіх інструктараў. Далей гэтыя мабілізаваныя перамяшчаюцца назад у Расею для вядзеньня баявых дзеяньняў на тэрыторыі Ўкраіны», — сказаў Сяргей Наеў у інтэрвію ўкраінскаму выданьню РБК-Україна.
Апроч таго, паводле яго, яшчэ з кастрычніка мінулага году Расея разьмясьціла 9 тысяч сваіх вайскоўцаў на падставе рашэньня аб разгортваньні ў Беларусі рэгіянальнай групоўкі войскаў Саюзнай дзяржавы.
Сяргей Наеў падкрэсьліў, што вайсковае кіраўніцтва дэтальна вывучае пытаньне магчымага паўторнага наступу з тэрыторыі Беларусі.
«Па стане на сёньня можна канстатаваць, што ўдарных варожых фармаваньняў з боку Беларусі ня выяўлена. Цяпер вайсковую інфраструктуру Беларусі — палігоны, палявыя навучальныя цэнтры і гэтак далей — Расея выкарыстоўвае як месцы падрыхтоўкі, зладжваньня і аднаўленьня асабовага складу», — дадаў камандуючы Аб’яднаных сіл Узброеных сіл Украіны.
Сяргей Наеў удакладніў, што сфармаваныя на тэрыторыі Беларусі расейскія падразьдзелы адпраўляюцца эшалёнамі на ўсход і поўдзень Украіны.
«Падразьдзелы Беларусі, якія дысьлякаваныя ўдоўж украінскай мяжы, ударнага патэнцыялу ня маюць і могуць ажыцьцяўляць толькі абаронныя апэрацыі ўласнай мяжы. Цяпер баявыя здольнасьці беларускіх узброеных сіл ацэньваюцца як нізкія. Але наша выведка працягвае працу, каб своечасова выявіць зьмены ў абстаноўцы», — падкрэсьліў Сяргей Наеў.
Дзяржаўная мяжа паміж Беларусьсю і Ўкраінай складае 1084,2 км, зь іх 758,3 км на сухаземным участку, 325,9 км на водным участку (па рэках Дняпро, Сож і Прыпяць) і каля 120 км у зоне адчужэньня каля Чарнобыльскай АЭС.
Тэрыторыя побач зь дзяржаўнай мяжой цяжкапраходная, вялікія плошчы пакрытыя густымі лясамі, балотамі, азярынамі і разгалінаванай сеткай мэліярацыйных каналаў, большасьць якіх даўно ня дзейнічае.
Пасьля адыходу расейскіх войскаў з Кіеўскай, Чарнігаўскай і Сумскай вобласьці Ўкраіна ўзмацніла ахову мяжы зь Беларусьсю. Паміж двума краінамі ўзводзіцца так званая «сьцяна», усталёўваецца відэаназіраньне, выкопваюцца супрацьтанкавыя равы, павялічылася да 2 кілямэтраў памежная замінаваная зона.
Кіраўніцтва Беларусі падтрымала агрэсію Расеі супраць Украіны і дазволіла скарыстаць вайсковую інфраструктуру і паветраную прастору для ўварваньня расейскай арміі і абстрэлаў мірных гарадоў Украіны, ахвярамі якіх сталі дзясяткі тысяч цывільных украінцаў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
