10 сакавіка ў Менску пачынаюць судзіць экспэртку па этыкеце Аксану Зарэцкую разам з бізнэсоўцам Багданам Караўцом, паведамляе «Вясна».
Аксана Зарэцкая – сябра асноўнага складу Каардынацыйнай Рады, трэнерка па этыкеце і бізнэс-камунікацыях, культуралагіня, магістарка пэдагогікі. Мае дваіх дзяцей.
Яе будуць судзіць разам з палітзьняволеным заснавальнікам кампаніі Astronim і фэстывалю маркетынгу і рэклямы «Белы Квадрат» Багданам Караўцом.
Іх абвінавачваюць паводле арт. 342 КК (актыўны ўдзел у групавых дзеяньнях, якія груба парушаюць грамадзкі парадак). Справу ў судзе Маскоўскага раёна Мінска будзе разглядаць судзьдзя Кацярына Мурашка.
Аксану Зарэцкую і заснавальніка кампаніі Astronim Багдана Караўцова абвінавачваюць паводле арт. 342 КК (актыўны ўдзел у групавых дзеяньнях, якія груба парушаюць грамадзкі парадак).
Хто такая Зарэцкая
Аксана Зарэцкая вядомая сваімі лекцыямі пра культуру, майстар-клясамі па этыкеце, публікацыямі і тэлевыступамі. Яна стваральніца Школы дзелавой культуры і этыкету, выкладчыца культуралёгіі і эстэтыкі, філязофіі і дыпляматычнага пратаколу. Валодае францускай і ангельскай мовамі. Суарганізатарка першага ў Беларусі Венскага балю, традыцыя якога ўключаная ў сьпіс нематэрыяльнай спадчыны UNESCO.
Ад жніўня 2020 году Аксана Зарэцкая ўваходзіла ў асноўны склад Каардынацыйнай рады, дзе займалася пытаньнямі арганізацыі сходаў і навучаньня мясцовых суполак, а таксама праводзіла лекцыі-сустрэчы пра нізавую дэмакратыю і прынцыпы самакіраваньня на прыкладзе Швайцарыі, дзе яна пражыла больш за 10 гадоў.
Хто такі Каравец
24 кастрычніка стала вядома пра затрыманьне дырэктара кампаніі Astronim Багдана Караўца. Гэтая кампанія ўзьнікла яшчэ ў 2000 годзе, займаецца распрацоўкай сайтаў пад розныя задачы і комплекснымі інтэрнэт-рашэньнямі: кансалтынг, маркетынг, праграмаваньне, дызайн і рэкляма ў інтэрнэце.
25 кастрычніка блізкі да ГУБАЗіК тэлеграм-канал выклаў відэа, на якім Каравец гаворыць, што затрыманы за ўдзел у пратэстных маршах 2020 году.
У кейсе кампаніі больш за 1000 розных праектаў. Адзін зь іх — распрацоўка сайту ды іншых прадуктаў для банку БелВЭБ.
