Паводле баромэтра свабоды прэсы RSF, з 550 журналістаў і работнікаў СМІ, якія цяпер знаходзяцца ў зьняволеньні па ўсім сьвеце, 73 — больш за 13% — жанчыны, і гэтая доля падвоілася за апошнія пяць гадоў.
Жанчыны-журналісткі сталі ахвярамі перасьледу ў 14 краінах сьвету, асабліва ў Кітаі (21 журналістка знаходзіцца ў турме), Іране (12), Беларусі (10), Віетнаме (4) і Турэччыне (4).
Раней праваабарончы цэнтар «Вясна» прывёў статыстыку па беларускіх рэпрэсіях. Паводле інфармацыі праваабаронцаў, у Беларусі ў месцах няволі знаходзяцца 155 жанчын-палітвязьняў, 70 зь якіх перасьледуюць за ўдзел у акцыях пратэсту ў 2020 годзе. Агулам жа за пратэсты супраць Лукашэнкі і вайны ва Ўкраіне на пазбаўленьне і абмежаваньне волі асудзілі ня менш як 534 жанчын.
Рэжым Лукашэнкі, адзначае «Вясна», перасьледуе жанчын, утрымлівае іх у няволі за ўдзел у акцыях пратэсту, камэнтарыі ў інтэрнэце, выступы супраць вайны, інтэрвію СМІ, што прызнаныя экстрэмісцкімі, прафэсійную дзейнасьць, «акты тэрарызму, якіх не было».
Крымінальныя справы за ўдзел у акцыях пратэсту распачалі супраць 271 жанчыны. Па справе за нэгатыўныя камэнтары пра сьмерць супрацоўніка КДБ Дзьмітрыя Федасюка, застрэленага IT-спэцыялістам Андрэем Зельцарам, у дом якога ўварваліся сілавікі, асудзілі 15 жанчын (у зьняволеньні застаюцца 8). Жонцы Зельцара Марыі Ўсьпенскай, абвінавачанай у саўдзеле, прызначалі прымусовае лячэньне ў псыхіятрычным стацыянары і абавязалі яе сплаціць буйную суму на карысьць жонкі Федасюка.
За «сумленнае выкананьне сваёй працы» ўлады пакаралі вялікімі тэрмінамі супрацоўніц СМІ, адзначае «Вясна».
Галоўнага рэдактара і дырэктара інфармацыйнай кампаніі БелаПАН Ірыну Леўшыну прыгаварылі да 4 гадоў калёніі за «стварэньне экстрэмісцкага фармаваньня», журналістку Ірыну Слаўнікаву паводле таго ж артыкула — да 5.
Журналістка тэлеканалу «Белсат» Кацярына Бахвалава (Андрэева) асуджана агулам на 8 гадоў і 3 месяцы калёніі, у тым ліку за «здраду дзяржаве», былая журналістка Белтэлерадыёкампаніі Ксенія Луцкіна, якой інкрымінавалі «змову з мэтай захопу ўлады неканстытуцыйным шляхам», — на 8.
Фігурантак «справы Аўтуховіча» 61-гадовую Галіну Дзербыш і 56-гадовую Вольгу Маёраву прыгаварылі да 20 гадоў зьняволеньня фактычна «за акты тэрарызму, якіх не было», гаворыцца ў дакумэнце.
Днямі дэмакратычная лідэрка Сьвятлана Ціханоўская завочна асуджаная на 15 гадоў пазбаўленьня волі.
Аляксандар Лукашэнка неаднаразова заяўляў, што «з жанчынамі не ваюе».