Румынія прыпыніць працу Расейскага цэнтру культуры і навукі, які знаходзіцца ў Бухарэсьце, паведаміў сайт Міністэрства замежных спраў Румыніі.
Пра гэта праінфармавалі пасла Расеі ў Румыніі Валерыя Кузьміна, якога выклікалі ў ведамства. Дыплямату, як паказана ў заяве, нагадалі аб выпадках, калі цэнтар «займаўся скажэньнем рэальнасьці і гістарычнай праўды», а пасьля ўварваньня Расеі ва Ўкраіну адхіліўся ад сваіх мэтаў ва ўмацаваньні культурных сувязяў і «ператварыўся ў інструмэнт прапаганды, дэзынфармацыі і апраўданьня ваенных злачынстваў Расейскай Фэдэрацыі ва Ўкраіне».
Дзяржаўны сакратар у стратэгічных справах Румыніі таксама выказаў абурэньне ў сувязі з «пастаяннымі спробамі гібрыдных атак і дэзынфармацыі шляхам выбарачнага прадстаўленьня і наўмыснага маніпуляваньня рэальнасьцю», што робяцца расейскім бокам, і заклікаў адмовіцца ад такой практыкі.
Праца цэнтру прыпыніцца не пазьней за 20 жніўня 2023 году, да гэтага часу павінны завяршыцца ўсе адміністрацыйныя працэдуры, гаворыцца ў паведамленьні.
Цэнтар у Бухарэсьце створаны на падставе пагадненьня паміж Румыніяй і Расеяй, падпісанага ў 2013 годзе. Яго адкрылі ў траўні 2015 году.
Румынія выказала занепакоенасьць сытуацыяй вакол Малдовы, дзе нядаўна выкрылі пляны прарасейскага дзяржаўнага перавароту. Прэзыдэнтка Малдовы Мая Санду 21 лютага прысутнічала ў польскай Варшаве на выступе прэзыдэнта ЗША Джо Байдэна. ЗША асобна падтрымалі дэмакратыю ў Малдове і захады, якія робіць гэтая дзяржава, каб захаваць свой сувэрэнітэт.
