Адзін з судоў Мікалаева арыштаваў і перадаў у кіраваньне АРМА (адмысловае агенцтва, якое ажыцьцяўляе кіраваньне канфіскаванай маёмасьцю. — РС) два асфальтабэтонныя модульныя заводы ў Ачакаўскім і Вазьнясенскім раёнах Мікалаеўскай вобласьці, якія належалі менскаму «Будаўніча-мантажнаму трэсту № 8» і берасьцейскаму «Дарожна-будаўнічаму трэсту № 4».
Абедзьве кампаніі ўдзельнічалі ў рэалізацыі ў Мікалаеўскай вобласьці ініцыяванай прэзыдэнтам Украіны Ўладзімірам Зяленскім праграмы «Вялікае будаўніцтва».
У судовым рашэньні адзначаецца, што менскі «Будаўніча-мантажны трэст № 8» цягам 2018–2022 гадоў удзельнічаў у 38 публічных конкурсах і быў прызнаны пераможцам у 16 тэндэрах на 2,41 мільярда грыўняў (каля 60 мільёнаў даляраў у эквіваленце. — РС). Апошні кантракт не пасьпелі падпісаць, бо пачалася вайна.
Берасьцейскае прадпрыемства цягам 2017–2022 гадоў удзельнічала ў 130 публічных конкурсах, але перамагло толькі ў 29-ці — агульная вартасьць кантрактаў склала 2,84 мільярда грыўняў. Адзін кантракт таксама сарваўся праз вайну.
Абодва прадпрыемствы будавалі дарогі ў Кіеўскай, Чаркаскай, Кіраваградзкай, Херсонскай, Мікалаеўскай, Валынскай, Ровенскай, Жытомірскай і Палтаўскай вобласьцях.
Сярод канфіскаванай маёмасьці таксама спэцыяльная аўтамабільная тэхніка, дызэльная электрастанцыя і генэратар.
Мікалаеў і Мікалаеўская вобласьць да апошняга працягвалі супрацу зь беларускімі прадпрыемствамі, нягледзячы на ўведзеныя супраць іх санкцыі ў Эўрапейскім Зьвязе.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
